Foto/Google.

DILI (TATOLI)- Sekretáriu Estadu Formasaun Profisionál no Empregu (SEPFOPE), Julião da Silva, hatete  Korean International Cooperation Agency (KOICA) iha kompromisu atu suporta sentru treinamentu vokasionál sira ne’ebé maka hetan ona akreditasaun, maibé tulun ne’e ba sentru sira ne’ebé durante ne’e iha progresu di’ak.

“Sira iha inovasaun iha serbisu durante ne’e, entaun Governu liuhusi serbisu SEPFOPE nia papél atu buka investór, buka parseiru sira atubele investe ba sentru treinamentu hirak ne’e para eleva kapasidade joven sira di’ak liután para fasil asesu iha kampu traballu, la’ós de’it atu bá serbisu iha Korea, maibé mós eleva kapasidade joven sira ne’ebé remata estudu iha ensinu sekundáriu”, Julião hatete iha Kaikoli, ohin, hafoin remata enkontru ho reprezentante KOICA.

Daudaun ne’e SEPFOPE no KOICA iha faze diskusaun hela, maibé ajénsia ne’e kompromete atu ajuda.

“Depois ami ko’alia ho tékniku SEPFOPE para dikute ho KOICA nian depois koopera ho Ministériu Edukasaun. Setór tolu ne’e servisu hamutuk para haree, maizumenus halo saida, oinsá?  Área saida mak ita presiza atu investe para kapasita ita-nia joven sira bele aprende”.

Júlio hatutan sentru treinamentu sira hanesan Bekora, Tibar, Don Bosku no fatin seluk ne’e presiza lori bá to’o iha munisípiu sira.

“Labele iha Dili, karik iha tempu badak ami sei hahú iha munisípiu haat ka lima uluk”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here