Primeiru Vice Prezidente Parlamentu Nasional Angelina Sarmento.

DILI (TATOLI) –Vise Prezidente Parlamentu Nasionál (PN), Maria Angelina Sarmento, informa debate programa governu nian sei hahú iha Kuarta-Feira (bainrua-red), maibé antes ne’e lider bankada sira halo reuniaun hodi aprova prosesu tomak debate nian.

“Iha enkontru lider bankada mak sei aprova kona-ba prosesu tomak debate nian, tanba ne’e hein katak semana ne’e ka Kuarta-Feira sei halo debate ba programa governu da-ualu nian,” Maria Angelina Sarmento informa ba jornalista sira iha PN, ohin.

Nia hatutan katak tempu atu debate programa governu depende ba desizaun hosi konferénsia lider bankada nian, maibé tuir planu Prezidente PN, Arão Noe sei propoin durante loron tolu nia laran ba debate programa governu nian, hahú hosi Kuarta to’o Sesta.

Hosi debate programa governu nian, Primeiru Ministru, Taur Matan Ruak mak sei aprezenta programa hodi asume responsabilidade tomak.

Hosi aprezentasaun Xefe Governu, Taur Matan Ruak sei responsabiliza ministériu hotu nian no tuir rejimentu governu sei aprezenta iha minutu 40 nia laran hodi halo aprezentasaun hafoin fó tempu ba deputadu sira atu halo apresiasaun no halo aprovasaun.

“Primeiru Ministru sei reprezenta membru governu hotu hodi halo aprezentasaun programa iha plenária,” nia esplika.

Enkuantu, iha konstituisaun la ko’alia kona-ba aprezentasaun programa governu ho kondisaun tenke ho membru governu kompletu. Maibé iha konstituisaun hateten iha dentru loron 30 nia laran hahú hosi governu simu pose tenke aprezenta ona programa governu mai parlamentu.

Entretantu, Programa Governu, PN simu ona iha Sesta loro kraik semana kotuk no Prezidente PN baixa ona ba komisaun ida-idak atu halo leitura ba programa governu. Ohin ho aban Prezidente sei konvoka reuniaun lider bankada atu bele diskute giaun ba debate programa nian.

Jornalista : Zezito Silva

Editór : Manuel Pinto

 

HAKEREK NO HATÁN

Please enter your comment!
Please enter your name here