Deputadu sira hosi koligasaun partidaria, ohin liuhosi plenária la aprova vizita Prezidente Repúblika, Francisco Guterres Lú Olo, ba Portugal. Foto António Goncalves

DILI (TATOLI) – Parlamentu Nasionál (PN), liu hosi votasaun iha reuniaun plenária estraordinária ohin, aprova ona, pedidu karakter urjénsia husi proposta governu ho votu afavor 36, kontra 27 no abstensaun 1.

Proposta lei hosi ne’e atu husu autorizasaun estraordinária ba realizasaun transferénsia Fundu Petrolíferu hodi sustenta mákina estadu.

Prezidente Parlamentu Nasionál (PPN), Arão Noe deklara Proposta Lei nú 1/V(1a) liu nia karakter urjénsia, tanba ne’e sei kontinua prosesu.

“Ita fó tempu komisaun C hodi aprova ninia relatóriu apresiasaun ba jeneralidade ninian, hafoin ita reúne iha plenária hodi kontinua prosesu”, nia informa.

Ministra Finansas em ezersísiu, Sara Lobo Brites esplika, total orsamentu iha rejime duodecimo fulan Jullu nian, saláriu no vensimentu ita presiza US$ 17,4 millions, bens de servisus US$ 31,4 millions, transferénsia públikas US$ 19,3 millions, dezenvolvimentu US$ 20,3 millions, portantu total ba fulan Jullu US$ 88,8 millions.

“Ho balansu ne’ebé agora kofre estadu iha US$ 20 millions dezde loron 10 Jullu, ninia défisit ba US$ 88,8 millions, ita bele kálkulu katak governu sei labele atende hotu despeza sira ne’ebé mak justifika ona ba nesesidade urjente ba ami nia pedidu ne’e”, nia esplika tan.

Iha fatin hanesan Ministra ne’e husu, presiza iha konsiderasaun, pedidu ne’e situasaun urjente tanba agora ita tama ona iha faze atu selu saláriu.

“Los duni US$ 20 millions to’o para selu saláriu, maibé despeza sira ne’ebé ohin ha’u dehan ne’e urjente hotu. Ami husu uma fukun ne’e atu konsidera pedidu ne’e hanesan urjente”.

Deputadu husi bankada FRETILIN, Antonino Bianco deklara, nia parte vota kontra tanba lei ne’e iha ona.

“FRETILIN vota kontra tanba FRETILIN hatene lei ne’e iha kedan. Dentru prinsípiu sira ne’ebé mak iha, governu se de’it bainhira situasaun orsamentu laiha, nia iha kbiit atu transfere osan tuir rejime duodecimal. Agora lei iha hela tanba saida sira lakohi? Ne’e sira atu dada tempu para atu kria krize despeza ba estadu ne’e”, Antonino lamenta.

Enkuantu Xefe bankada Partidu Demokrátiku (PD) António da Conceição hateten nia parte vota kontra  la’ós tanba kontra osan, maibé tanba prinsípiu ne’ebé opta iha inísiu.

“Ha’u vota kontra tanba prinsípiu inkonsisténsia ne’ebé governu ne’e aprezenta. Uluk rekere situasaun ida no agora impoin situasaun seluk. Ha’u nia vota la’ós kontra osan, maibé vota kontra tanba prinsípiu ne’ebé mak opta iha inísiu, agora favorese kuandu iha oportunidade”, Eis Ministru ne’e levanta.

Maibé, Deputada Carmelita Moniz husi bankada CNRT konsidera nia tenke afavor tanba hanesan devér ida nu’udar deputada.

“Ha’u vota afavor tanba nu’udar devér ida, nu’udar deputada Parlamentu Nasionál atu tau osan iha dezenvolvimentu povu no rai ida ne’e. Ha’u vota afavor tanba louva oitavu governu konstitusionál tenke kumpre lei no implementa lei tuir nia dalan los, lei fundu petrolíferu no lei orsamentu jestaun finanseira,” Carmelita deklara.

Nia parte suporta proposta ne’e la’o ho karater urjénsia tanba la admite governu atu foti osan sein koñesimentu no autorizasaun PN.

Jornalista: Julia Chatarina

Editór : Manuel Pinto

Le moos: http://www.tatoli.tl/2018/07/meza-pn-baixa-ona-proposta-governu/

HAKEREK NO HATÁN

Please enter your comment!
Please enter your name here