Komandante PNTL

DILI, (TATOLI) – Polísia Nasionál Timor-Leste (PNTL), oras ne’e hasoru difikuldade ba kombustível atu halo operasaun.

“Problema ida ne’ebé ami informa ba Prezidente-Repúblika kona-ba situasaun jerál atendementu ba serbisu operasaun ninian, ezemplu, kombustível ba kareta nomós manutensaun kareta atu utiliza hodi halo operasaun ninian”, Komandante Jerál PNTL, Júlio da Costa Hornay, hato’o ba jornalista sira iha Palásiu Prezidente Nicolau Lobato, Bairru Pité, kinta ne’e hafoin enkontru ho Prezidente-Repúblika, Francisco Guterres Lú Olo.

Nia haktuir kombustível laiha ona, tanba ne’e, Komandante Polísia Distritál sira informa ba Komando PNTL atu rezolve urjentemente.

“Hanesan Komandante Jerál ha’u hateten katak ida ne’e kestaun Governu ninian. Ne’e duni, husu ba komandante sira hotu katak neneik ka lalais sei rezolve kestaun refere”, Hornay tenik.

Nia apela ba Komandante Polísia Distritál atu orienta nafatin membru sira para mantein atividade operasionál ba povu no nasaun.

“Ita labele uza argumentu dehan difikuldade hirak ne’e sai hanesan obstákulu para ita atu halo serbisu,” Komandante Jerál ne’e fó hanoin.

Júlio Hornay haklaken orsamentu envelope atu atende difikuldade hirak ne’e iha ona no hein de’it nia ezekusaun.

Iha okaziaun ne’e, nia mós relata ba Prezidente-Repúblika katak situasaun iha territóriu Timor laran la’o hakmatek no nia kontinua alerta ba joven sira atu mantein matenek ka maturidade polítika hodi garante estabilidade nasionál.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here