Prezidente KI, Virgílio Guterres . Foto TATOLI: Egas Cristovão

DILI, (TATOLI) – Konsellu Imprensa (KI) organiza Dili Dialogu Forum ho tema “Kria Rede Hodi Hametin Mekanizmu ba Auto-regulasaun Mídia iha Rejiaun Sudeste Áziatika no Pasífika”, durante loron rua, hahú ohin no termina aban.

Atividade ne’e partisipa husi reprezentante KI Indonézia, Tailándia, Filipina no Papua Nova Guinea (PNG), inklui Organizasaun Nasaun Unida ba Siénsia no Kultura (UNESCO-sigla inglés), no IFJ (International Federation of Journalist).

Atividade ne’e realiza iha salaun Ministériu Finansa (MF) Aitarak Laran, ho diskusaun hamutuk Kria Rede Hodi Haforsa Mekanizmu ba Auto-regulasaun Mídia iha Rejiaun Sudeste Áziatika no Pasífika.

Prezidente KI, Virgílio Guterres, iha abertura hato’o benvindu ba bainaka onradu, husi nasionál nomós internasionál sira, inklui jestór mídia imprensa, elektrónika no online tomak iha TL.

Atividade ne’e rasik loke ofisialmente husi Sekretáriu Estadu Komunikasaun Sosiál, Merício Juvinal dos Reis “Akara”, hodi reprezenta Primeiru-Ministru, Taur Matan Ruak.

Hafoin loke, halo kedas aprezentasaun husi Laureadu Nobel ba Dame, José Ramos Horta, ho tópiku, papel mídia hodi promove transparánsia no governasaun di’ak no harii demokrasia.

Depois, konsultante mídia, Bob Howart, kona-ba oinsá Korpu Auto-regulasaun Mídia iha Rejiaun Sudeste Áziatika no Pasífika luta kontra hoax (informasaun falsa) iha mídia sosiál no oinsá governu nia intervensaun.

nune’e mós aprezentasaun husi reprezentante SEAPA (Southeast Asian Press Alliance), Eko Maryadi, kona-ba oinsa fó advokásia no monitoriza implementasaun auto-regulasaun mídia iha rejiaun.

Seluk mak aprezentasaun kona-ba oinsá mekanizmu globál no esforsu, ne’ebé UNESCO hodi hametin mekanizmu ba auto-regulasaun mídia, husi reprezentante diretór UNESCO Shabaz Khan, asesór komunikasaun no informasaun, Lim Ming Kuo.

Hafoin aprezentasaun, sei iha mós aprezentasaun husi Autoridade Nasionál Komunikasaun (ANC-sigla portugés) nomós framework legál hodi haforsa no hametin indepedénsia mídia iha eleisaun, ne’ebé sei aprezenta husi CNE (Comissão Nacional das Eleições), STAE (Sekretariadu Tékniku Administrasaun Estatál) no PNTL (Polísia Nasionál Timor-Leste), no depois interveniente prinsipál seluk ne’ebé identifikadu husi KI, hodi envolve iha forum ne’e.

Entretantu, atividade realiza tanba patrisionadu husi UNESCO inklui entidade governu no privadu timoroan sira mós.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here