Ilustrasaun hosi google.

DILI, (TATOLI) – Dosente Fakuldade Ekonomia, Universidade Nasionál Dili (UNDIL), Paulino Filomeno, hatete atu ekonomia rai-laran bele la’o ho di’ak maka Orsamentu Jerál Estadu (OJE) tenke iha no fó prioridade uluk ba setór agrikultura, tanba maioria populasaun Timor-Leste moris ho vida agrikultór.

“Timór nia hun no abut ne’e agrikultura. Timór atu di’ak ka ladi’ak depende ba agrikultura la’ós buat rebo-rebo, edukasaun, saúde no buat hotu depende ba agrikultura, kuandu isin di’ak mak ko’alia edukasaun, kuandu hahán iha maka ko’alia saúde, satán realidade Timór ne’e porsentu 80 agrikultór entaun tenke rezolve lai porsentu 80 ne’e, bainhira rezolve ona maka buat hotu rezolvidu”, Paulino katak iha UNDIL, ohin.

Paulino hatutan setór agrikultura maka dahuluk iha país ne’e no turizmu mós importante, maibé to’os no natar mak tenke dezenvolve maka’as, tanba ema presiza ai-han loroloron.

“Prioridade agora ne’e orsamentu sai ba liu agrikultura atu responde ema maioria nia interese”.

Profesór ne’e afirma daudaun ne’e povu sente ekonomia iha rai-laran afeta ba sira la’ós tanba osan, maibé sistema governasaun.

“Osan barak mós lahalo buat ida tanba sistema polítika lafó fatin. Tuir ha’u nia haree osan barak liu depois lahatene jere tanba polítika nasaun ne’ebé la’o laloos”, tenik.

Timor-Leste daudaun seidauk iha OJE rasik tanba ho situasaun polítika iha rai-laran, nune’e atu funsiona mákina Estadu maka Governu utiliza orsamentu duodésimu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here