Diretór Jerál Estatístika Ministériu Finansas, Elias dos Santos Ferreira. Foto/MF.

DILI, (TATOLI) – Diretór Jerál Estatístika Ministériu Finansas, Elias dos Santos Ferreira, hatete diresaun jerál sei halo peskiza emprezariál 2017 ne’ebé sei halo vizita bá empreza kuaze 3.212 iha Timor-Leste laran tomak.

“Ita sei hatene nia GDP (gross domestic product) ne’e hira, iha 2017 nia halo projetu, nia rekruta ema timoroan karik hira, estranjeiru hira, depois ho projetu ne’e Governu selu ona ka seidauk ita sei hatene iha ne’ebá”, Elias afirma iha Kaikoli, ohin.

Objetivu husi peskiza ne’e foku ba informasaun ne’ebé hetan husi atividade peskiza emprezariál mak kompila ba konta nasionál, atu hatene kontribuisaun setór privadu hotu ba ekonomia país nian rasik, no hatene kuantidade ema ka porsentu traballadór timoroan, estranjeiru liuliu ba feto no mane durante períodu tinan ida.

Metodolojia ne’ebé uza ba atividade ne’e mak hetan informasaun husi Tributária, Servisu Rejistrasaun no Verifikasaun Emprezariál (SERVE), Free Balance no Alfándega (Custom).

“Peskiza emprezariál ami halo tiha ona teinamentu, finaliza tiha ona. Ita espera katak loron ida ka rua sira sei bá munisípiu vizita empreza sira ne’ebé kona amostra ne’e depois husu ita-boot nia empreza moris sá tinan, halo atividade saida, tinan-tinan selu taxa ba Governu hira”, haktenik.

Atividade ne’e sei halo durante fulan rua hahú husi jullu to’o setembru 2018.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here