Prokuradór Jerál Repúblika (PJR), José da Costa Ximenes

DILI (TATOLI)—Prokuradór Jerál Repúblika (PJR), José da Costa Ximenes, lakohi fó komentáriu kestaun balun ne’ebé relasaun ho segredu justisa.

“Sira ne’ebé iha investigasaun normalmente ha’u la fó informasaun tanba hakarak proteje segredu justisa,” Ximenes hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, relasiona ho informasaun katak kandidatu membru Governu na’in 9 ne’ebé Prezidente-Repúblika kestiona tama lista investigasaun iha Ministériu Públiku.

Nia esplika, sira ne’ebé tama ona iha tránzitu julgadu, ida ne’e maka Ministériu Públiku bele fó informasaun.

“Purtantu, ha’u lakohi ko’alia detallu ba kestaun sira hanesan ne’e, tanba Ministériu Públiku ne’e prinsípiu legalidade. Se ami sujeita ba prinsípiu legalidade, ami labele viola prinsípiu ida ne’e,” Prokuradór Jerál esklarese.

Ximenes informa, iha ámbitu kooperasaun institusionál, órgaun titulár hosi órgaun soberania sira sempre iha komunikasaun ba malu no iha komunikasaun sira ne’e la’ós merese pasa informasaun ba mídia komunikasaun sosiál, pur-ezemplu, Parlamentu Nasionál ho Ministériu Públiku, Parlamentu Nasionál ho Governu no Parlamentu Nasionál ho Prezidénsia Repúblika ne’e iha komunikasaun balun ne’ebé apropriadu, maibé la’ós matéria divulgasaun nian.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here