Prokuradór Jerál Repúblika (PJR), José da Costa Ximenes

DILI (TATOLI)—Prokuradór Jerál Repúblika (PJR), José da Costa Ximenes, hato’o Planu Asaun Anuál hosi Prokuradoria Jerál Repúblika ba Prezidente Repúblika, Francisco Guterres Lú Olo, Tersa ne’e, iha Palásiu Prezidente Nicolau Lobato, Bairru Pité.

Nia esplika, Planu Asaun Anuál ne’e kona-ba alargamentu territoriál, katak, hakarak atu estabelese tan Ministériu Públiku iha Munisípiu Lautém no Manufahi nomós planu atu halo rekrutamentu ba ofisiál justisa atu apoiu majistradu sira.

“Hanesan ita-boot sira hatene katak formasaun majistradu no defensór públiku sira ba da-neen termina tiha ona no na’in lima maka aloka mai iha Ministériu Públiku. Signifika, ita presiza rekruta ofisiál justisa para apoiu sira na’in lima ne’ebé dadaun ne’e hahú ona iha faze prátika iha Ministériu Públiku,” Ximenes informa.

Iha biban ne’e, Prokuradór Jerál ne’e mós hato’o preokupasaun balun relativamente ho kestaun kontensiozu Estadu ninian.

“Kontensiozu Estadu ne’e Ministériu Públiku halo intervensaun defende Estadu, ema koletivu nomós singulár, ne’ebé prosesu totál ne’ebé rejistadu purvolta 185. Entre 185 ne’e, iha kazu kontensiozu Estadu nian sivíl (administrativa no kontas) ne’ebé rejista ita konsege termina prosesu 141 no prosesu 141 oras ne’e iha ona Tribunál Distritál sira, liu-liu pursentu 90 (90%) rejista iha Tribunál Distritál Dili, iha ne’ebé balun rejista durante tinan 9 liu ona, balun tinan 8, tinan 7 no 5, maibé sein movimenta iha Tribunál sira,” Ximene hato’o.

Nia haktuir, kazu sivíl sira ne’ebé ladún movimenta iha Tribunál Distritál sira maka hanesan kazu ofensa integridade fízika no danu (estragus), iha ne’ebé Tribunál la rezolve ninia fundu (hún) tanba iha fundu ne’e ema disputa kona-ba rai no baku malu.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here