Ministru Reforma Lejislativa no Asuntu Parlamentár, Fídelis Leite Magalhães. Foto António Goncalves

DILI (TATOLI) – Ministru Reforma Lejizlativa no Asuntu Parlamentár (MRLAP), Fidelis Leite Magalhães, lori governu nia naran fó agradese ba opozisaun (Fretilín/PD) iha Parlamentu Nasionál (PN), tanba hatudu vontade atu apoiu programa governu nian, maski programa ne’e rasik, parte governu seidauk submete ba PN.

“Antesipadamente Ami hakarak fó obrigadu ba opozisaun parlamentu nian, mezmu programa ho orsamentu ladauk lori ba PN, maibé sira hakarak lais ona atu sira apoia no aprova,” Fidelis Magalhães ba Ajénsia Tatoli iha PN, Ohin.

Ho apoiu hosi bankada Opozisaun sira nia, Fidelis garante katak, governu da-ualu sei ukun durante mandatu ida, basa governu iha maioria parlamentár no hetan apoiu másimu hosi opozisaun tan.

“Buat ne’ebé mak determina governu ne’e estavel ka lae, opozisaun sira nia votu ba programa no orsamentu ne’e importante,” Fidelis haktuir. No promete bainhira programa no orsamentu hetan apoiu hosi PN ho unanimidade, ajuda ona governu atu servisu hosi benefísiu povu nia moris.

Iha fatin Vise Xefe Bankada Partidu Demokrátiku (PD), Adriano do Nascimento, garante sei fó apoiu ba governu kona-ba aprezentasaun programa governu ho orsamentu hodi ba povu nia moris di’ak.

“Aban ka bainrua lori ona programa ho orsamentu mai atu diskute lais hodi ami aprova,” nia sujere.

“Imi aprezenta alternativa di’ak ami sei apoiu, la di’ak ami fó hanoin tanba papél opozisaun ne’e atu fó hanoin, maibé hanoin krítiku, la’ós yes Man de’it.

Entretantu, Deputada Fretilín, Maria Angelica Rangel, husu governu ne’ebé harii hosi Aliansa Mudansa ba Progresu (AMP) entre partidu PLP, CNRT ho Khunto, atu lori Orsamentu Jerál Estadu (OJE) ho programa lais atu bele hakotu preokupasaun povu nian, bankada Fretilín la’ós krítika de’it, maibé atu fó solusaun.

Relasiona ho ida ne’e horisehik (Segunda-red) Primeiru-Ministru Taur Matan Ruak, preside reuniaun Konsellu Ministru estraordinária, hodi rona aprezentasaun Plafond Orsamentu Jerál Estadu ba tinan 2018 nian, ne’ebé aprezenta hosi tékniku sira Ministériu Finansas nian.

Governu da-ualu hakarak atu hakotu ona ezekusaun Orsamentu Rejime Duodecimal durante ne’e ba Orsamentu normal OJE 2018. Iha semana ne’e, programa Governu nian sei submete ba Parlamentu Nasionál atu hetan aprovasaun, i hafoin ne’e sei kontinua submete fali OJE 2018.

Fó hanoin fila fali katak, dezde Governu anterior to’o ohin loron, mákina Estadu nian funsiona de’it ho Orsamentu Rejime duodecimal, tanba ne’e VIII Governu hakarak hakotu lailais Rejime duodecimal ne’e ho Orsamentu Jerál Estadu 2018 atu nune’e bele fasilita VIII Governu Konstitusionál atu hala’o knaar no mós hodi selu dividas Estadu nian no pagamentu hirak ne’ebé pendente.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here