Vise-Dekanu Estudantil, Fakuldade Siénsia Sosiál (FSS), Universidade Nacional Timor Lorosa’e (UNTL), Camilo Ximenes

DILI (TATOLI) – Observadór Polítika hosi Universidade Nasionál Timor-Leste (UNTL), Camilo Ximenes, husu Tribunál Distritál Dili (TDD) atu labele fó sai segredu justisa, sein iha orientasaun hosi Prokuradoria Jerál Repúblika (PJR).

Observasaun ne’e Camilo halo relasiona karta Sertifikasaun hosi TDD ba Prezidente Kongresu Nasionál Rekonstrusaun Timorense (CNRT-Sigla Portugés), Xanana Gusmão, foin lalais ne’e, nu’udar resposta hosi TDD nian ba Karta ne’ebé Xanana Gusmão haruka ba Tribunál, Tanba Prezidente Repúblika rejeita fó pose ba membru CNRT na’in 9 atu integra iha VIII governu.

“Ierarkia hosi tribunál nian presiza tenke respeita, sé Tribunál Distritál Dili bainhira atu fó sai lista ruma ka naran hirak ne’ebé Prezidente Repúblika rejeita, atu sai membru governu. Naran hirak ne’e, los ka lae tenke iha orientasaun hosi Prokuradoria Jerál Repúblika, sé la iha ita la kumpre ona burokrasia institusionál,” Camilo Ximenes ba Ajénsia Tatoli iha Universidade Timor Lorosa’e, kaikoli, Ohin.

Camilo sente katak, situasaun polítika ne’ebé akontese entre órgaun soberanu sira halo sosiedade Timor konfunde no atu la fiar servisu tribunál.

“Iha konflitu interese entre partidu ka lideransa sira, tribunál ida ne’ebé mak iha kompeténsia atu rezolve krize ne’ebé afetadu hosi órgaun soberania,? realmente TDD fó sai lista ne’ebé Prezidente halo pendente, maibé la iha autorizasaun hosi PJR. Oinsá mak ita bele sai hosi impase polítika enkuantu lider polítiku balun sai fali porta vóz justisa ka tribunál nian no balun sai fali advogadu,” Camilo lamenta.

 “La sala bainhira Prokuradoria Jerál Repúblika husu Tribunál Distritál Dili atu haree rekomendasaun ne’ebé iha, maibé se ida-idak fó sai rasik signifika ita tama ona iha orientasaun polítika. Ignora ona segredu justisa.”

Ho nune’e nu’udar ema akadémiku ida ne’ebé observa hosi ókulu polítiku, Camilo deskonfia justisa Timor-Leste hahú kahur ona ho polítika, no nia dehan justisa ho polítika mak kahur ona, sei fó risku boot ba nasaun nia vida.

Tanba ne’e atu evita nasaun nia vida iha perigu, di’ak liu mak diálogu tenke kontinua nafatin hosi lideransa sira, labele ho surat tahan mutin de’it, maibé tenke iha ona konkordánsia definitive atu estrutura governu bele kompleta ona.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here