António da Conceição. Foto Antonio Goncalves

DILI (TATOLI) –Xefe Bankada Partidu Demokrátiku (PD) liuhosi deklarasaun polítika iha plenária parlamentu nasionál husu ba bankada FRETILIN ho Bankada Koligasaun Aliansa Mudansa ba Progresu-AMP, tenke loke komunikasaun polítika ba malu hodi hamihis deferénsia, entre bankada rua ne’e.

Tuir PD nia haree, Parlamentu Nasionál (PN) nu’udar órgaun estadu ne’ebé kompoin husi partidu polítiku oin-oin, tanba ne’e, tenke iha mós responsabilidade atu promove konsertasaun polítika hodi hamihis diferensa sira ne’ebé iha.

“Parlamentu Nasionál presiza loke komunikasaun polítika ida entre bankada AMP no bankada FRETILIN, hodi fó alternativas ba Prezidente Repúblika (PR) nó mós Governu atu buka solusaun ikus ba andamentu polítika ida agora daudaun Governu hasoru”, Xefe Bankada PD, António da Conceição deklara iha nia deklarasaun polítika ba plenária, PN, ohin.

Tuir nia, labele husik situasaun polítika kontinua la’o hanesan ne’e tanba fulan 11 ona mak povu terus, tanba ne’e bankada PD lakohi atu situasaun ne’e la’o hanesan ne’e nafatin.

“Situasaun hanesan ne’e la’ós de’it halo povu terus, maibé mós bele hamosu krize sosiál ne’ebé direita ka indireitatamente sei afeta ba pás, seguransa, no estabilidade.”

“Prosesu dezenvolvimentu labele la’o ba oin bainhira laiha pás, seguransa no estabilidade no dezenvolvimentu sei labele la’o bainhira povu hahú apátiku tanba hahalok lider sira nian ne’ebé lá hanoin povu nia terus, maibé nafatin hakarak dada malu hodi haterus liután sira,” Nia  akresenta.

Tuir Antonio, governu ida labele funsiona efetivu no efisiente bainhira ministériu sira importante no estratéjiku ninia ulun laiha, tanba ne’e husu ba bloku AMP (CNRT, PLP, no KHUNTO) hodi koopera ho Prezidente repúblika nune’e forma Governu ida ne’ebé kredivel, íntegru, hodi hala’o knar ho responsabilidade no transparente, nune’e bele presta atendimentu ida di’ak, efetivu no efisiente ba servisu sira públiku nian.

“PD hare katak, diferensa no diverjénsia sira ne’e mosu tanba auzénsia diálogu entre lider istóriku sira. Se ita bele tuur no halo diálogu ho ita nia funu maluk, tanba sá mak ita ho ita labele tuur hamutuk hodi ko’alia ba malu konaba interese nasionál ita nia rain nian? Ba PD, diálogu nu’udar dalan ne’ebé di’ak liu hodi hakat liu diferensas sira”, Eis Ministru Komérsiu Indústria no Ambiente (MKIA), iha sétimu governu ne’e fó hanoin.

Entretantu, Bankada AMP kompostu hosi partidu sira ne’ebé hahoris VIII governu  no FRETILIN nu’udar bankada Opozisaun Parlamentár ho asentu hamutuk 23 kadeira iha Parlamentu Nasionál.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here