Feto diplomata sira halo diskusaun. Foto TATOLI: Rafy Belo

DÍLI, (TATOLI)-Ministériu Negósiu Estranjeiru no Kooperasaun (MNEK) koordena no serbisu hamutuk ho embaixada Nova Zelándia iha Timor-Leste (TL) kapasita feto diplomata timoroan sira atu sai lideransa di’ak.

Kapasitasaun ne’e hala’o iha MNEK, Praia dos Coqueiros-Díli, iha fim-de-semana ne’e, nu’udar faze ba daruak nian.

“Ami halo koordenasaun i serbisu hamutuk ho Nova Zelándia. Ida ne’e, ideia ida mai husi embaixadora Nova Zelándia, Viki Poole, ne’ebé mak hakarak halibur, la’ós feto diplomata timoroan sira maibé ho mós feto diplomata husi embaixada sira ne’ebé mak akredita mai Timor, ne’ebé mak nia rezidénsia iha ne’e,” informa diretora ba sósiu-kultura ASEAN, Maria Lidia Soares ba Ajénsia TATOLI, iha MNEK, Praia dos Coqueiros-Díli.

Diretora Maria Lidia Soares informa tan katak atividade kapasitasaun ne’e la’ós foin ba dahuluk maibé ba daru’ak, diferente mak iha nia tipu formasaun ne’e.

“Ida ne’e segudanvez, maibé ida ne’e foin hothotu, tanba iha primeiravez ami hala’o iha abril, hanesan ba introdusaun de’it, ne’e só ba kargu xefia sira. Maibé, iha segundavez ne’e halibur feto diplomata sira hothotu,” akresenta diretora ba sósiu-kultura ASEAN (Association of South East Asean Nation) ne’e.

Espetativa husi kapasitasaun ne’e, tuir diretora Maria Lidia, katak feto dipomata timoroan sira bele sai lider di’ak maske TL nu’udar nasaun ki’ik.

“Esperansa, hakarak iha loron ikus ida, feto diplomata sira hanesan ita nasaun ki’ik, maske ita haree katak reprezentasaun feto iha parlamentu aas, maibé ita hakarak oinsa aban bainrua feto sira bele sai lider di’ak liu. Ida ne’e mak objetivu husi atividade ida ne’e,” nia espera.

Embaixadora Nova Zelándia, Vicki Poole, iha fatin hanesan, konfirma ba TATOLI katak iha atividade ne’ebé halibur feto diplomata sira hotu, alende ko’alia kona-ba situasaun feto nian maibé mós ko’alia kona-ba feto nia lideransa sira.

“Oinsa prepara feto sai lider, enkoraja feto sira atu ko’alia perante mane sira nomós haree oportunidade ho meius ne’ebé diferente. Halo brainstorming kona-ba ideia ne’ebé diferente, ko’alia kona-ba feto diplomata sira; dezafiu no oportunidade sira,” dehan diplomata Nova Zelandeza ne’e.

Entretantu, durante atividade ne’e la’o, Ajénsia TATOLI observa katak inisialmente diplomata feto sira ne’e halo introdusaun ba malu, pois halo diskusaun temátiku relevante ho kestaun feto ho diplomasia, halo sínteze no ikus taka ho aprezentasaun husi reprezentante kada grupu ba malu no vise-versa.

 Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here