Logo MF. Foto/Google.

DILI, (TATOLI) – Diretór Jerál Finansas Estadu Ministériu Finansas (MF), Januário da Gama, hatete prosesu preparasaun tékniku ba Orsamentu Jerál Estadu (OJE) 2018 nian ministériu daudaun prepara hela no liuhusi orientasaun polítika mai husi Konsellu Ministru indika katak estensaun ba aplikasaun rejime duodesimál ida ne’e to’o de’it iha agostu 2018.

“Signifika téknikamente Ministériu Finansas tenke esforsu aan hodi prepara orsamentu 2018 para bele aprezenta ona ba Parlamentu Nasionál no tama ona ba prosesu diskusaun, iha parte apresiasaun, plenária no bele tama iha aprovasaun finál”, Januário afirma iha konferénsia imprensa bainhira halo distribuisaun Dotasaun Orsamentál Temporária jullu nian iha MF Aitarak-Laran, ohin.

Bainhira hatán kona-ba proposta OJE 2018 nian, diretór jerál ne’e esplika katak daudaun ne’e MF halo hela ezersísiu ida no tenke halo revizaun ba kapasidade ezekusaun husi orsamentu duodesimál ne’e rasik, hira mak presiza projesaun to’o dezembru tinan ne’e nia rohan para bele hetan balansu fiksu ida.

“Nune’e mós husi tetu orsamentu ne’ebé iha ita tenta para depois bele realoka ba estrutura foun husi Oitavo governu konstitusionál nian”, katak.

Diretór Jerál Finansas Estadu. Foto/MF.

Hatutan iha reuniaun Konsellu Ministru (13/7) deside iha governasaun ida ne’e sei aplika rejime DOT ba fulan rua mak husi períodu jullu to’o agostu.

“Signifika atubele hakore an husi aplikasaun rejime duodesimál ida ne’e Ministériu Finansas tenke elabora ona orsamentu 2018 no hetan aprovasaun husi Parlamentu Nasionál no promulgasaun husi Prezidente Repúblika para bele ezekuta orsamentu foun ne’e iha inísiu setembru 2018”.

Januário hatutan sobre prosesu elaborasaun ba DOT ne’e nia baze mak husi cash balance tinan kotuk nian ne’ebé husi períodu janeiru to’o maiu kuaze ezekuta hotu ona no husi juñu, jullu no agostu ho aprovasaun husi Konsellu Ministru nian katak sei dada fundu minarai atubele finansia desepeza ba fulan sira ne’e.

“Haree tuir ita-nia kapasidade tetu orsamentu duodesimál nian, fulan-fulan ita iha kapasidade atu gasta de’it ho nia nivel média porsentu 64 signifika osan ne’ebé ita dada ne’e kada fulan laliu husi millaun 70, signifika iha períodu fulan rua ita presiza de’it millaun 140 atubele finansia despeza iha fulan rua nian laran”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here