Logo MF. Foto/Google.

DILI, (TATOLI) – Ministériu Finansas (MF) iha Governu Konstitusionál daualuk distribui ona Dotasaun Orsamentál Temporária (DOT) jullu 2018 ba liña ministeriál, instituisaun Estadu no ajénsia autónoma ho totál alokasaun hamutuk millaun 88.9.

Xefe Unidade Gabinete Komunikasaun no Informasaun, Agostinho Castro, haktuir MF fahe DOT ida ne’e atubele utiliza durante vijénsia períodu duodesimál nian.

“Aprovasaun fulan-jullu husi Konsellu Ministru deside alokasaun DOT ba fulan ida ne’e ho totál millaun 88.9. Husi totál ida ne’e hetan redusaun porsentu 16 bainhira kompara ho DOT fulan-juñu 2018”, Agostinho hatete iha konferénsia imprensa sobre distribuisaun DOT ne’ebé halo ohin (16/7), iha MF Aitarak-Laran.

Agostinho hatutan husi redusaun ne’e lafó efeitu ba konsiderasaun atividade balun ne’ebé identifikadu hodi fó atensaun iha ezekusaun jullu nia laran nu’udar despeza esensiál hanesan pagamentu saláriu vensimentu no pensaun veteranu, arrendamentu no despeza operasionál embaixada nian, despeza urjente balun iha ámbitu ospitál referál, Ospitál Nasionál Guido Valadares, no serbisu saúde munisipál, akizisaun medikamentu no insumu médiku iha ámbitu serbisu SAMES, despeza ba kombustivel, despeza iha liña orsamentál serbisu profisionál nian, despeza seluk ne’ebé iha klasifikasaun urjente no inadiavel depende sufisiénsia ba fonte finansiamentu DOT nian.

Diretór Jerál Finansas Estadu, Januário da Gama, hatutan sobre progresu ezekusaun DOT husi janeiru to’o juñu 2018 taxa ezekusaun iha nivel média to’o de’it iha porsentu 64.

“Tanba ita-nia prosesu ezekusasaun ida ne’e sempre kaduka iha fim do mês entaun nia prosesu ne’e mak ita lori bá fulan tuirmai no tanba ho limitasaun períodu ba ezekusaun nian iha períodu orsamentu duodesimál nian hamosu duni taxa ezekusaun ne’ebé ki’ik, maibé nafatin korresponde ho nesesidade ministériu no instituisaun sira hotu”.

Notísia ne’ebé relasiona :

DOT Juñu 2018 Hamutuk Millaun 114.2

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here