Ministra Edukasaun Juventude no Desportu (MEJD), Dulce de Jesus Soares. Imajen/ Fundasaun Alola

DILI, (TATOLI) – Ministra Edukasaun Juventude no Desportu (MEJD), Dulce de Jesus Soares, hatete programa MEJD ba loron 100 mak garante prosesu aprendizajen no formasaun ba profesór sira, inklui preparasaun ba eventu ruma iha Sekretariu Estadu Juventude no Desportu (SEJD).

“Ami mós hateten filafila katak infraestrutura mak sai ami-nia problema ida, maibé enjerál atu garante serbisu iha nível ministériu to’o iha munisípiu, iha parte sekretáriu estadu nian mós hanesan, mantein serbisu ho buat ne’ebé mak iha”, afirma ministra ba jornalista sira iha Palásiu Governu, ohin.

Ministra Dulce de Jesus akampaña husi Sekretáriu Estadu Juventude no Desportu, Nélio Isaac Sarmento, hasoru Primeiru-Ministru, Taur Matan Ruak, hodi relata servisu ministériu nian hafoin simu pose.

“Ami mai relata de’it katak mezmu serbisu ne’e iha fatin rua ketaktetak, maibé ami hala’o ami-nia serbisu ho funsionáriu sira”, dehan.

Hasoru malu ne’e, nia dehan Xefe Governu motiva sira atu kontinua halo servisu ho di’ak. “Hanesan motivasaun mai ami, atu ami na’in rua kontinua hala’o serbisu mezmu foin komesa atu di’ak liután”, konklui ministra Dulce de Jesus.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here