Reitór UNTL, Francisco Miguel Martins. Foto Tatoli/Egas Cristovão

HERA, (TATOLI)- Reitór Universidade Nasionál Timor Lorosa’e (UNTL), Francisco Miguel Martins, hatete UNTL hetan ajuda husi Governu Japaun dezde universidade ne’e harii bainhira Timor-Leste seidauk restaura nia independénsia.

Iha 17 novembru 2000 UNTL formalmente harii husi Sérgio Viera de Melo, ne’ebé dirije Administração Tranzitória Nasaun Unida iha Timor-Leste (UNTAET), entre 1999 no 2002,  no Kay Rala Xanana Gusmão ne’ebé momentu ne’e sei sai  prezidente CN-CNRT.

“Entaun UNTL moris tiha antes iha 2001 ne’e Japaun iha kedan hanoin para ajuda ita-nia universidade ne’e liuhusi fakuldade ida ne’e (Fakuldade Enjeñaria Siénsia no Teknolojia) no dezde ne’e Japaun fornese prefesór na’in-tolu, espesialista kona-ba ejeñaria mekánika, sivíl no fízika para atu reforsa profesór sira iha ne’e, renova kurríkulu sira”, reitór relata iha FEST Hera, ohin, iha ámbitu entrega ekipamentu ba fakuldade ne’e husi Governu Japaun.

Aleinde ne’e Japaun liuhusi JICA (Agência de Cooperação Internacional do Japão) halo reabilitasaun urjente ba fakuldade ne’e tanba bainhira indonéziu sira sai sunu hotu. Iha altura ne’ebá Japaun halo urgent rehabilitation para alunu sira iha fakuldade enjenãria iha Dili muda mai iha ne’e (Hera) para espasu ne’e bele utiliza hodi eleva sira-nia kualidade teoria no prátika.

“Dezde 2001 ne’e sira tama, ajuda no la’ós ida ne’e de’it tanba altura ne’ebá difikuldade transporte husi Hera bá Dili, Dili mai Hera, entaun sira fornese mós bis ida atu tula estudante sira bá-mai depois ita sosa tan ita-nia, ajuda tan truck ho bis ruma para lori estudante sira”.

Nune’e to’o agora Japaun kontinua apoia universidade ne’e liuliu iha dezenvolvimentu rekursu umanu nomós finansia hodi halo instalasaun foun ba FEST ne’ebé daudaun konstroe ona no sei remata iha tinan oin ne’ebé sei kompleta ho ekipamentu laboratóriu ba kada departamentu, maibé ba edifísiu ne’ebé iha (existing building) iha 12 jullu 2018 hahú ona entrega atu estudante no dosente bele implementa sira-nia abilidade iha interasaun teoria no prátika nian.

Diretór Jerál Ensinu Superiór, Elsa Maria Correia, hatete Governu Japaun fó ona kontribuisaun barak ba dezenvolvimentu ensinu superiór iha Timor-Leste espesiál iha área edukasaun liuliu FEST UNTL.

“Ita-nia kooperasaun ho Governu Japaun hahú kedan inísiu independénsia to’o atuál. Apoiu ne’e iha setór oioin iha dezenvolvimentu nasionál ita-nian liuliu ba fakuldade ida ne’e, hahú haruka dosente husi universidade rekoñesidu iha Japaun atu mai suporta ensinu aprendizajen, apoia iha ekipamentu, fó bolsu estudu ba dosente atu eleva nia grau akadémiku, apoia mós estudante atu halo estudu komparativu no kapasitasaun iha fakuldade laran atu eleva koñesimentu dosente iha área pedagojia, metodolojia nomós peskiza no prezentemente halo espansaun iha projetu konstrusaun edifísiu fakuldade ida ne’e”.

Tanba ne’e nia dehan nu’udar sidadaun timorense, estudante, dosente, funsionáriu ba universidade (UNTL) ne’e tenke orgullu ba kooperasaun ne’ebé Governu no povu Japaun halo iha Timor-Leste liuliu ba FEST.

Embaixadór Japaun, Hiroshi Minami, hatete Japaun apoia ona dalabarak iha prosesu konstrusaun Timor-Leste dezde 1999 liuhusi implementasaun projetu barak no país ne’e sei kontinua fó apoiu dezenvolvimentu iha área rekursu umanu nian.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here