Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur

DILI, (TATOLI) – Xefe Estadu FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba Prezidente-Repúblika (PR), Francisco Guterres Lú Olo no Primeiru-Ministru (PM), Taur Matan Ruak, atu uza kompeténsia tuir lei haruka.

“Uza de’it. Konta ho ami Forsa Armada nia apoiu ba ita-boot sira nia desizaun”, Lere hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin enkontru ho Prezidente-Repúblika, Francisco Guterres Lú Olo, kona-ba situasaun polítika iha rai laran.

“La’ós tanba de’it ema na’in ualu ka sia ne’e maka ema miliaun ida resin ne’e atu terus ba sira. Ida ne’e injustisa. Ita nia aswa’in sira ne’ebé mate ona ne’e mós labele mate folin laek tanba de’it sira na’in ualu ka sia ne’e”, Lere realsa.

Nia hakktuir situasaun polítika ne’ebé maka oras ne’e la’o ne’e la’ós joven sira maka halo, maibé mosu hosi líder istóriku sira, tanba ne’e, nia propoin ba líder istóriku sira atu kompriende malu no buka diálogu atu hatúr ezemplu di’ak ida ba jerasaun futuru.

“Uluk ita dehan liberta pátria no liberta povu, tan ne’e, karik impase polítika ida ne’e atu liberta povu hosi ki’ak? Ha’u hanoin katak lae. Ita lakohi ita-nia nasaun ne’e monu hikas ba krize ruma”, eis líder rezisténsia afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here