Primeiru-Ministru, Taur Matan Ruak. Foto Tatoli/Xisto Freitas

DILI, (TATOLI) – Primeiru-Ministru, Taur Matan Ruak, troka ona membru Governu ne’ebé antes ne’e Prezidente-Repúblika (PR) kestiona, relasiona ho diskunfia ba partisipasaun ekonómika.

Membru Governu ne’ebé hetan troka maka Gastão de Sousa ne’ebé antes ne’e tama iha lista okupa Ministru Planeamentu Investimentu Estratéjiku (MPIE), substitui hikas hosi Kay Rala Xanana Gusmão no Marcos da Cruz okupa kargu Vise Ministru Agrikultura no Peskas, substitui hosi Rogério Araújo Mendonça nu’udar Sekretáriu Estadu Peska.

“Ha’u troka ona kandidatu membru Governu na’in rua ne’ebé antes ne’e Prezidente Repúblika kestiona”, Taur Matan Ruak hato’o ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Xefe Estadu, Francisco Guterres Lú Olo.

Taur esplika membru Governu balun ne’ebé seidauk simu tomada pose, hanesan Primeiru-Ministru, nia sei kontinua halo diskusaun ho Prezidente-Repúblika para bele hetan solusaun ida. “Pur-enkuantu to’o oras ne’e ami seidauk iha solusaun”, esklarese.

Iha oportunidade ne’e, Xefe Governu afirma situasaun atuál (polémika pose membru Governu) la implika ba estabilidade rai laran, tanba Prezidente-Repúblika, Primeiru-Ministru, Parlamentu Nasionál no timoroan hotu-hotu ninia kompromisu ida de’it maka hametin estabilidade no pás, no hamutuk oinsá atu kontribui ba dezenvolvimentu ekonómiku Timor nian.

Naran sira ne’ebé substitui kandidatu inísiu ne’e, Prezidente-Repúblika dekreta ona liuhusi Dekretu Prezidente Repúblika Nú. 21/2018 iha 5 jullu 2018, maibé, en-felizmente, membru Governu hirak ne’e (Kay Rala Xanana Gusmão no Rogério Araújo Mendonça) la marka prezensa atu simu pose iha Palásiu Prezidente Nicolau Lobato, segunda (horisehik).

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here