Ministru Defeza (MD), Filomeno da Paixão de Jesus. Foto António Gonçalves

DILI, (TATOLI) – Ministru Defesa (MD), Filomeno Paixão de Jesus, hateten governu  sei rekrutan tan membru FALINTIL-Forsa Defesa Timor-Leste (F-FDTL) rihun ida resin iha tinan oin hodi kompleta rihun tolu atus neen tuir planu forsa 2020.

ʺIta iha ona rihun rua, tanba ne’e ita planu rekruta tan rihun ida atus neenʺ, dehan ministru ba jornalista sira hafoin hasoru malu ho Primeiru-Ministru, Taur Matan Ruak, iha Palásiu Governu, ohin.

Governante ne’e hateten soldadu hirak ne’e sei destaka ba komponente terestre, navál,  apoiu servisu, no sentru formasaun terenu.

Biban ne’e ministru mós haktuir asuntu hasoru malu ho Xefe Governu. ʺPrimeiru-Ministru bolu ha’u mai hodi hahú asume kargu iha ministériu ne’e para halo reuniaun ho diretór jerál, diretór hodi haree no prepara iha konsellu ministru kuarta abanʺ, dehan Ministru Defesa.

Governante ne’e hateten sei aprejenta relatóriu servisu ministériu ne’e nian iha governu dahituk ba governu foun iha reuniaun konsellu ministru.

ʺOhin mak ha’u foin ba loloos iha Ministériu Defesa para simu relatóriu ne’e atu aban (kuarta) ha’u apresenta iha konsellu ministruʺ, tenik.

Ministru defesa ne’e hatutan sei rona barak liu bainhira partisipa enkontru konsellu ministru iha semana ne’e.

ʺHa’u mai rona mak barak liu, programa governu nian em jerál, maibé partikulár saida maka hanoin atu halo ba ministériu ne’e durante fulan hirak ne’e to’o dezembruʺ, dehan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here