Deputadu sira preta omenajen ikus ba antigu deputadu Armindo da Conceição Silva Freitas iha sesaun solene iha plenária tersa (10/7). Imajen Tatoli/Zezito da Silva

DILI, (TATOLI) – Parlamentu Nasionál (PN) presta omenajen ikus ba Armindo da Conceição Silva Freitas, hanesan antigu deputadu Assembleia Konstituante no lejislatura dahuluk.

Deputada Albina marçal Freitas husi bankada CNRT iha ninia deklarasaun haktuir: “Ita boot eroi ne’ebé mak hatudu mai ita liuliu ba jerasaun foun sira no povu Lautem, sei la haluha ita boot ne’ebé mak hatúr iha tempu difísil”.

“Nune’e, bankada CNRT hato’o sentidu kondolénsia ba família lutada, ho tulun Maromak nian, tulun rai lulik, foho lulik, tasi lulik, saudozo Armindo bele hetan fatin murak iha Maromak nia kadunan santu, boa viajen saudozo kompañeiru luta”.

Nune’e mós deputada Josefa Álvares Pereira Soares husi bankada FRETILIN aprezenta nia sentidu pézames ba espoza, oan kiak no família lutada tomak eis deputadu ne’e.

“Iha loron ne’ebé halo ita hasoru malu, iha mós loron ne’ebé halo ita fahe malu. Fahe malu apenas iha jornada mundu ne’e ninian, maibé sempre iha memória ne’ebé husik maluk sira hotu atu hanoin nafatin”, katak nia.

“Nune’e ohin bankada parlamentár FRETILIN ba uluk nanain agradese profundamente ba señor Armindo nia kontribuisaun ba rezisténsia no konstrusaun Estadu, kontinua defende nafatin prinsípiu no valores luta liuhosi partidu FRETILIN to’o ohin loron”.

Nia hatutan tan iha Asembleia Konstituinte no lejislatura dahuluk, uitoan ka barak nu’udar deputadu, kontribui hodi halo Konstituisaun RDTL no lei lubuk ida.

“Bankada parlamentár FRETILIN hato’o agradesimentu ba família ho kolaborasaun ho señor Armindo hodi defende nafatin valór luta nian ne’ebé ohin loron sai mihis ba bebeik. Ami hanoin katak kontribuisaun no partisipasaun iha prosesu tomak ba ita nu’udar reflesaun ba ohin loron ninian”, katak.

Hodi husu ba governu ho nia dever konstitusionál, atu tau matan nafatin ba oan kiak no feto faluk sira tuir lei ne’ebé vigora iha Timor-Leste.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here