Parlamentu Nasionál. Foto Relasaun Públika PN

DILI, (TATOLI) – Vise Xefe Bankada Frente Revolusionária Timor-Leste Independente (FRETILIN), Francisco Miranda Branco, afirma projetu lei anti korupsaun ne’ebé aprejenta hosi bankada FRETILIN ho Partidu Demokrátiku (PD) aprezenta ona ba meza parlamentár laiha relasaun ho desizaun Prezidente Repúblika, Francisco Guterres Lú Olo, kona-ba kandidatu membru governu ne’ebé mak sei pendente.

“Projetu lei anti korupsaun ne’ebé ami aprezenta horiseik laiha ligasaun ho ida ne’e ka desizaun prezidente nian, maibé ida ne’e ami nia kompromisu iha kampaña no agora tenke implementa saida mak ami kompromete ba povu”, Branco ba jornalista sira liuhosi konferénsia imprensa iha uma fukun parlamentu, ohin.

Francisco Branco akresenta partidu Fretilin ho PD iha ona kontratu sosiál ho povu ka eleitór sira kona-ba lei anti korupsaun, nune’e projetu lei ne’e laiha ligasaun ho desizaun Xefe Estadu nian ba kandidatu hirak ne’ebé prosesa ona iha tribunál.

“Ami nia kampaña hosi partidu rua nian atu halo lei anti korupsaun. Ida ne’e mós la’os foin mak hahú, maibé inisia ona iha terseira lejislatura iha 2014, ami deputadu lubun ida hatama ona projetu lei ba meza parlamentár maibé la diskute to’o kaduka tiha”, haktuir nia.

Maibé iha lejislatura da-lima, sira nian parte hakarak hatama fila-fali, nune’e bele diskute tanba kria ona komisaun anti korupsaun, mas laiha lei anti korupsaun atu sai baze hodi kombate korupsaun.

Iha parte seluk, Xefe Bankda PD, Adriano do Nascimento, reforsa projetu lei ne’ebé aprezenta la’os kestaun polémika desizaun prezidente nian, maibé ne’e kna’ar nu’udar lejisladór.

PD ho FRETILIN subskreve ezbosu projetu lei ne’e tanba konsidera importante atu fasilita ka haforsa liu tan Komisaun Anti Korupsaun (KAK) hodi hala’o servisu di’ak. Tanba ne’e, parlamentu presiza fasilita lei atu sira halo kna’ar ho profesionál.

“Ami espera katak projetu lei ne’ebé mai hosi partidu FRETILIN ho PD, lideransa meza prezidénsia parlamentu bele fó importánsia. Depois ne’e sei iha prosesu lubuk ida mak prezidente elabora ka nota téknika informa ba lider bankada sira hafoin hatun ba komisaun depois komisaun elabora pareser jurídika hafoin mai fali iha plenária”, esplika.

Atu aselera ka la’e, nia dehan prosesu hirak ne’e mai hosi prezidente parlamentu nia liman katak atu halo lais ka lori ba plenária ou la’e depende desizaun.

Bankada sira nia pozisaun ho esperansa deputadu AMP mós fó apoiu hodi diskute no aprova lei ne’ebé importante tebes ba nasaun ne’e.

“Ita koalia kona-ba kombate korupsaun, maibé kuandu la iha lei, ita sei labele halo buat ida”, katak.

“Ami husu ba deputadu AMP ne’ebé maioria parlamentár fó importánsia atu apoiu hodi aprova lei ne’e lalais”.

Nia husu ba públiku atu akompaña saida mak FRETILIN ho PD hatur dadauk iha parlamentu hodi fó importánsia, tanba partidu rua iha kompromisu kampaña eleitorál mak lei anti korupsaun.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here