Partisipante formasaun radiofónika. Foto: AHMDTL

DILI, (TATOLI) – Asosiasaun defisiénsia kompostu husi Asosiasaun Halibur Defisiente Matan Timor-Leste (AHDMTL), Asosiasaun Defiesiente Timor-Leste (ADTL), AISAHUN no Timor-Leste Blind Union (TLBU) partisipa formasaun radiofónika ne’ebé fasilita husi Fundasaun Media Development Center (FMDC) nu’udar kontinuasaun programa tinan kotuk.

“Ami kontinua fó oportunidade ba sira, prátika. Sira iha programa rasik iha rádiu kada kinta no sesta. Ami suporta de’it”, hatete jestór programa formasaun FMDC, Teodósia dos Reis, ba TATOLI iha Bairru Pité, Hudi Laran, ohin.

Programa sira ne’e mak livre talentu ema ho defisiénsia, aprezentasaun programa iha transmisaun direta no identifika tópiku no bainaka estúdiu.

Teodósia hatutan treinamentu dahuluk iha tinan kotuk maioria mane, nune’e haree ba esperiénsia ne’e, FMDC ho apoiu husi voluntáriu australiana, fó korajen ba feto atu partisipa iha formasaun ne’e.

“Feto dalaruma inklui ho mane sira dalaruma sira ta’uk, tanba ne’e halo proposta ba AVI (Australian Volunteer International) atu halo treinamentu espesiál ba feto”, dehan alumni komunikasaun sosiál, Universidade Nasionál Timor Lorosa’e (UNTL) ne’e.

Partisipante Paulina Soares demonstra sentimentu kontente ho formasaun ne’e. “Ha’u sente kontente tanba ha’u bele hatene ona informasaun balun, kona-ba oinsá entrevista ema iha terenu nomós iha estúdiu rasik. Ami halo simulasaun, koko entrevista malu”, dehan partisipante Paulina Soares, defisiente matan husi TLBU.

Paulina mós haktuir durante formasaun, sira entende lais tanba formadór sira esplika ho linguajen simples no adekuadu nune’e sira komprende kedas. Tanba ne’e nia espera atividade idéntika la to’o iha ne’e de’it.

“Atividade labele para iha ne’e de’it, ami hakarak kontinua ba oin nafatin”, sujere defisiente Paulina Soares.

Entretantu, atividade formasaun ne’e sei hala’o durante semana ida; hahú segunda horiseik no sei termina iha sesta agora. Enkuantu, programa refere sei remata iha dezembru tuir programa pilotu ne’ebé mak iha ona.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here