Foho Matebian Feto no Mane. Foto Facebook/Quelicai.

DILI, (TATOLI)-Diretór Jerál Turizmu Ministériu Turizmu, Komérsiu, Indústria no Ambiente (MTKIA), José Filipe Dias Quintas, hatete turizmu baze komunitária nafatin sai programa prioridade ministériu nian iha Governu Konstitusionál daualuk ne’e.

“Tansá mak turizmu baze komunitária sai hanesan prioridade, tanba ita-nia turizmu ne’e presiza dezenvolve husi baze. Ita hotu hatene katak baze ne’ebá mak poténsia lahalimar. Ha’u fó de’it ezemplu hanesan Jako, Hatubuiliku, Ataúru-Beloi sira ne’e furak”, Quintas afirma iha Sentru Konvensaun Dili foin lalais ne’e.

Tanba ne’e Governu iha nia polítika ne’ebé estabelese ona ba 2030 ne’e fó oportunidade liuliu ba turizmu iha baze ne’e tanba povu mak tenke sai alvu ba dezenvolvimentu turizmu.

“Povu mak sai alvu tanba povu rasik maka tenke goza indústria turizmu ne’e, benefísiu tenke ba sira labele ba ema liur”.

Nune’e Governu tenta nafatin no kria ona website ekoturizmu baze komunitária para promove komunidade sira ne’ebé loke restaurante, alojamentu, fa’an produtu lokál hanesan artezanatu para sira bele asesu bá merkadu.

“Problema boot ida turizmu baze komunitária hasoru mak asesu bá merkadu tanba sira laiha kapasidade atu promove produtu tanba sira lahatene, laiha koñesimentu entaun Governu liuliu Ministériu Turizmu, Komérsiu, Indústria no Ambiente tenta nafatin para fó apoiu másimu liuliu ba abitante (komunidade) lokál sira ne’ebé iha interese atu hola parte iha dezenvolvimentu turizmu iha Timor-Leste”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here