Prezidente Repúblika, Francisco Guterres Lú Olo, ohin iha Palásiu Prezidente Nicolau Lobato Bairo Pité.

DILI (TATOLI)—Prezidente Repúblika (PR), Francisco Guterres Lú Olo, lori povu tomak nia naran hato’o sentidu rekoñesementu ba Brigadeiru-Jenerál Filomeno da Paixão de Jesus, Nia dedikasaun ba FALINTIL, Forsa Defeza Timor-Leste (F-FDTL) no ba kauza nasionál.  

“Señór Ministru Defeza. Ha’u hato’o ohin ita-nia povu ninia rekoñesementu ba ita-nia dedikasaun ba FALINTIL, F-FDTL no ba kauza nasionál,” PR Lú Olo hato’o iha nia diskursu bainhira fó pose ba Brigadeiru-Jenerál Filomeno da Paixão de Jesus, nu’udar ministru Defeza nian iha oitavu governu, lidera hosi Primeiru Ministru Taur Matan Ruak, ohin iha Palásiu Prezidénsia, Bairru-Pité.

Lú-Olo konsidera Filomeno Paixão hanesan Timoroan ida ne’ebé hasai uluk liu kursu promosaun ba ofisiál jenerál, iha Portugal, ho knaar difisil ne’ebé nia simu no hala’o daudaun, Ministru Defeza hatudu mós vontade atu estuda no kapasidade atu hetan rezultadu di’ak.

Tanba ne’e mak nia konsege duni halo kursu direitu iha Fakuldade Direitu Universidade Nasionál Timor  Loro Sa’e, iha tinan 2012.

Ohin hahú dezafiu foun ida ba Ministru Filomeno ninia vida profisionál. “Ha’u- hatene katak Ita-Boot sei hatán ba dezafiu ida ne’e ho dedikasaun no entuziazmu nafatin, atu hetan susesu mós iha misaun foun ida ne’e,” Xefe estadu fó korajen.

“Ha’u konta ho Exelénsia atu lori knaar espesiál ida ne’e ba oin nu’udar responsavel ida ne’ebé sei haburas no hala’o polítika no lala’ok sira ne’ebé sei kaer metin soberania ba ita-nia rai furak ida ne’e.” PR Lú Olo hakotu lia.

Jornalista : Xisto Piedade

Editór : Manuel Pinto

HAKEREK NO HATÁN

Please enter your comment!
Please enter your name here