Uma Fukun Parlamentu Nasionál. Imajen/Espesiál

DILI, (TATOLI) – Prezidente Repúblika, Francisco Guterres Lú Olo, husu ona autorizasaun ba Parlamentu Nasional atu halo vizita Estadu ba Portugal  no Cabo Verde.

“Prezidente Repúblika husu autorizasaun mai parlamentu atu hala’o vizita Estadu ba Portugal no Cabo Verde, hahú iha 10 Juñu maibé retifika fali, entaun iha 5 juñu informa katak la ba Cabo Verde no ba de’it Portugal hahú iha 10 to’o 17 jullu, maibé ho situasaun polítika, parlamentu kansela viajen ne’e”, deputadu hosi Aliansa Mudansa ba Progresu (AMP), Francisco Vasconcelhos, bainhira lee deklarasaun bankada AMP no UDT no FM iha uma fukun, ohin.

Deputadu ne’e dehan povu sei presiza Xefe Estadu, atu kontribui estabilidade polítika ba governasaun Estadu nian no pás.

Nune’e partidu koligasaun partidária CNRT, PLP, KHUNTO, UDT no FM konsiénte papél parlamentu nian iha konstituisaun atu defende interese povu nian ne’ebé aas liu. Tanba ne’e la autoriza prezidente atu sai ba rai liur.

“La iha sentidu liu latak enkuantu formasaun governu da-ualu sei pendente hela, prezidente atu sai fali ba rai liur. Iha tinan kotuk prezidente rasik kansela nia dezlokasaun ba Nova Iorke atu partisipa Asembleia Jerál ONU ho razaun sei akompaña formasaun governu da-hitu hodi fó posse lais tuir kondisaun polítika, oinsá mak governu atuál prezidente labele foti medida hanesan ne’e”, haktuir.

Hodi hatutan tan katak iha loron 21 juñu, prezidente hatudu katak nia sei la fó posse ba ema nain 11, hosi membru proposta hamutuk 42 ne’ebé entrega hosi governu da-ualu nian. Ho razaun naran sira identifikadu iha instánsia judisiál.

Enkuantu, prezidente  fó ona posse ba ema balun de’it no la nomea seluk, biar nune’e, Primeiru-Ministru, Taur Matan Ruak, kontinua hasoru Xefe Estadu maibé la iha solusaun hodi forma governu ho kompletu.

Situasaun ne’e hanesan razaun ba deputadu koligasaun sira iha uma fukun hodi la autoriza Prezidente Repúblika ninia viajen.

Jornalista: Zezito da Silva

Editora: Rita Almeida

HAKEREK NO HATÁN

Please enter your comment!
Please enter your name here