Deputadu sira hosi koligasaun partidaria, ohin liuhosi plenária la aprova vizita Prezidente Repúblika, Francisco Guterres Lú Olo, ba Portugal. Foto António Goncalves

DILI, (TATOLI) – Parlamentu Nasionál (PN) liuhosi koligasaun partidária Aliansa Mudansa ba Progresu (AMP) ne’ebé kompostu husi partidu CNRT, PLP no KHUNTO hamutuk ho bankada UDT no FM rejeita vizita Prezidente Repúblika (PR), Francisco Guterres Lú Olo, ba Portugal ho votu kontra 35 no a favor 29.

Tuir ajenda vizita ne’e hahú iha loron 10 to’o 17 jullu ho razaun hametin lasu amizade entre Portugal ho Timor-Leste.

Xefe bankada Partidu Demokrátiku (PD), deputadu António da Conceição, hatete viajen ne’e kestaun interese nasionál, atu passa mensajen polítika husi país ho nasaun sira ne’ebé mak tau hela ita ninia interese ba.

“Ho nasaun Austrália ita iha hela kestaun interese nasionál ne’ebé rekere umanidade, ho portugal iha kestaun ne’ebé tenke lori ita hadi’a kestaun bilaterál, istóriku, lasu amizade ne’ebé mak ita tenke iha ho portugal”, tenik iha ninia intervensaun.

Nia konsidera vizita PR konstitui aktu diplomátiku autonível no reforsa papél ne’ebé mak governu hala’o. Tanba ne’e bankada PD mai ho konsiensia atu responsabilidade ho sentidu Estadu ba nasaun ne’e.

“Husu atu ita hotu tau ita nia interese, maske ita iha diverjénsia mas ita tenke hamutuk. Tanba ne’e mak bankada PD hanoin vizita ne’e importante”, afirma.

Deputadu Duarte Nunes husi bankada CNRT, konsidera relasaun entre Timor-Leste ho Portugal no Indonézia metin hela.

“Ha’u hanoin Prezidente ba ka la ba mós ita ho Portugal metin hela, sira sei la husik hela no ita sei la husik sira, durante ita nia servisu la’o hela”, akresenta.

Deputadu Luis Roberto husi bankada KHUNTO hatete ninia parte mós  hakarak kria amizade maibé tenke haree uluk situasaun rai laran.

“Ami mós hakarak para kria amizade entre nasaun rua, maibé ita tenke haree mós ba ita nia situasaun iha ita nia laran rasik, kuandu iha buat ruma ne’ebé mak seidauk loos hanesan funsionamentu seidauk la’o didiak karik, se bele Prezidente la’os ami kontra atu la ba, maibé se karik mós ita hotu timoroan no orgaun soberanu sira seluk ita koopera hamutuk para hadi’a”, dehan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here