DILI (TATOLI) – Parlamentu Nasionál (PN), liuhosi eleisaun ho votu sekretu husi lista únika, hili ona sidadaun na’in lima hodi sai membru Konsellu Estadu ho rezultadu unanimidade husi 63 deputadus prezente.
Sidadaun lima ne’e mak Aurora Ximenes (FRETILIN), Eduardo de Deus Barreto do Sahe (CNRT), José dos Santos Naimori Bukar (KHUNTO), José Cornélio Guterres (PLP), Arcânjelo de Jesus Goveia Leite (PD).
Entretantu, tuir artigu 90o konaba Konsellu Estadu iha konstituisaun RDTL, katak Konsellu-Estadu mak órgaun konsulta polítiku Prezidente-Repúblika, ne’ebé nia rasik prezide. Halo parte Konsellu-Estadu mak: Ex-Prezidente-Repúblika sira-ne’ebé la’ós destituidú, Prezidente Parlamentu Nasionál, no Primeiru-Ministru.
Nune’e mós, Sidadaun lima ne’ebé Parlamentu Nasionál hili ho armonia tuir prinsípiu reprezentasaun proporsionál, ba períodu tuir durasaun lejizlatura nian, ne’ebé la’ós membru hosi órgaun soberania nian no sidadaun lima ne’ebé Prezidente-Repúblika mak foti, ne’ebé la’ós membru hosi órgaun soberania nian, ba períodu ne’ebé hanesan ho durasaun tempu ukun Prezidente-Repúblika nian.
Artigu 91o mós hatutan, kompeténsia, organizasaun no funsionamentu Konsellu Estadu nian mak bele fó-sai kona-ba disolusaun Parlamentu Nasionál, fó sai konaba demisaun Governu nian, fó sai kona ba deklarasaun funu no oinsá atu hala’o dame, fó sai kona ba kazu seluk tan ne’ebé iha Lei-Inan no, iha jerál, hato’o konsellu ba Prezidente-Repúblika bainhira nia hala’o ninia knaar no karik bainhira nia husu.
Alende ida ne’e, artigu ne’e mós hatete Reuniaun Konselhu Estadu nian la’ós públiku no ikus liu lei mak define Konselhu Estadu nia organizasaun no funsionamentu.
Jornalista: Julia Chatarina
Editór : Manuel Pinto