DILI (TATOLI)—Primeiru Ministru, Taur Matan Ruak, sente ho laran ksolok tebes simu Ministru Defeza nian, Brigadeiru-Jenerál Filomeno da Paixão de Jesus, ne’ebé hahú ohin integra iha Governu Konstitusionál VIII.

“Ho serimónia solene ida-ne’e, ita kompleta tan faze ida ba prosesu konstituisaun plena ba governu ida ne’ebé sei lidera ita-nia Nasaun nia destinu iha tinan lima oinmai, tuir ita-nia povu ninia hakarak ne’ebé hato’o iha Eleisaun Lejizlativa Antesipada liubá ne’e,” Primeiru Ministru (PM), Taur Matan Ruak hato’o iha nia diskursu iha serimónia tomada pose Ministru Defeza nian, ohin, iha Palásiu prezidensiál, Bairru-Pité.

Iha oportunidade hanesan, nu’udar Xefe Governu, Taur Matan Ruak agradese ba Prezidente Repúblika ba ninia abertura no kooperasaun institusionál di’ak, ne’ebé permite atu viabiliza nomeasaun ba responsavel ezijente iha área governasaun maka Defeza Nasionál.

“Ami fiar katak ho manutensaun no aprofundamentu husi diálogu ne’ebé halo tiha ona entre Xefe Estadu no Xefe Governu, kona-ba personalidade ne’ebé tenke hetan nomeasaun atu tama iha Governu, iha tempu badak nia laran ami sei rezolve impase polítiku ne’ebé akontese daudaun ne’e tenke remata ona nomeasaun no pose ba membru Governu sira seluk,” Eis-Xefe estadu ne’e haktuir.

Nia dehan iha Sistema governu semi-prezidensiál ne’e ezijente no obriga responsavel polítiku sira hotu halo esforsu nafatin, liuliu ba sira ne’ebé maka hanesan titulár ba órgaun soberania sira atu tenke buka halo diálogu, debate no hetan solusaun sira ba kompromisu ne’ebé bele viabiliza funsionamentu Estadu nian no, ho ida-ne’e, labele fó obstákulu ka impede dezenvolvimentu no hadi’a kondisaun moris ita-nia Povu nian.

Demokrasia la obriga atu hotu-hotu tenke iha ideia hanesan, opiniaun hanesan ka vizaun polítika hanesan kona-ba futuru ita-nia Nasaun nian. Maibé domin ne’ebé, lahó exesaun, ne’ebé mak ita iha ba ita-nia Pátria no ba ita-nia Povu, obriga ita atu sai firme hodi buka nafatin konsensu no solusaun sira ne’ebé hanesan atubele hatán ba interese públiku nian.

“Ha’u sente seguru, iha kuadru normalidade konstitusionál nia laran, katak ita hotu sente orgullu, no regula husi prinsípiu sira respeitu no lealdade institusionál nian, Xefe Estadu no Xefe Governu sei kontinua halo diálogu atu buka solusaun no kompromisu sira ne’ebé bele viabiliza lalais liu tan, konkluzaun kona-ba formasaun Governu Konstitusionál VIII nianl,” Taur Matan Ruak, promete.

Nia fó agradese mós ba kompriensaun no kolaborasaun di’ak husi Brigadeiru-Jenerál Filomeno da Paixão de Jesus, ne’ebé atu husik nia kargu tenke liuhusi prosesu jurídiku-administrativu ne’ebé mak ezijente tebetebes, inklui konvokasaun ida husi Konsellu Ministru no Konsellu Nasionál Defeza no Seguransa nian estraordináriu ne’ebé fó-dalan atu nia mós bele kontinua serve ita-nia Pátria doben, hanesan nia nafatin halo ona, durante nia moris, agora ho funsaun governativa sira.

Sai hanesan onra ida boot tebes atubele mós konta iha ita-nia ekipa ho Ilustre Brigadeiru-Jenerál ida, ne’ebé leál, onestu, esperiente, kompetente no ho rékoñesidu méritu iha servisu sira ne’ebé fó ona ba ita-nia Nasaun durante Luta ba Libertasaun Nasionál no durante besik tinan ruanulu ba konstrusaun Forsa Defeza nian ida ne’ebé modernu, profisionál no efisiente, atubele hatán ba dezafiu lubun hirak interna no externa nian, iha Mundu ida ne’ebé modernu liután no inter-dependente.

Atu hakotu nia fó hanoin katak, iha ninia diskursu iha loron 22 fulan-Juñu tinan 2018, ba okaziaun tomada pose inisiál Governu ida-ne’e nian, nia temi ona katak presiza estabelese duni “Zona Dezenvolvimentu no Prosperidade Rejionál” ida, ne’ebé bazeia ba “reforsu ba dame, estabilidade no konfiansa Povu nian iha instituisaun sira.

Ho ida ne’e, nia fiar katak, ho nomeasaun ida-ne’e, bele hatán ba prioridade sira, hodi reforsa kompromisu Timor-Leste nian atu kontribui ba estabilidade, prosperidade, seguransa no armonia, interna no externa, ba ita-nia Nasaun, kondisaun fundamentál sira ba ita-nia adezaun ba ASEAN no ba konsolidasaun di’ak ba ita-nia Estadu Direitu Demokrátiku.

“Ami fiar mós katak iha kondisaun atubele hatán ba nesesidade sira dame nian, ne’ebé ezije husi ita-nia Povu no fundamentál ba prosesu dezenvolvimentu indivíduu no koletivu, sustentável no kontinuadu ida,” Taur Matan Ruak, hakotu lia.

Jornalista : Julia Chatarina/ Agapito dos Santos

Editór : Manuel Pinto

HAKEREK NO HATÁN

Please enter your comment!
Please enter your name here