Deputada AMP sira Vota iha Plenaria PN

DILI (TATOLI)Koligasaun partidária Aliansa Mudansa ba Progresu (AMP) ne’ebé kompostu husi bankada CNRT, PLP no KHUNTO hamutuk ho bankada UDT ho Frente Mudansa, liuhosi deklarasaun polítika bankada ne’ebé le husi Deputadu Francisco Vasconcelhos (PLP) deklara ona katak sei la autoriza Prezidente Repúblika (PR) sai ba rai li’ur, maski seidauk iha votasaun ba pedidu xefe estadu.

“Tanba ne’e labele duni autoriza Prezidente halo nia viajen ba rai li’ur, enkuantu impasse polítika ne’ebé Prezidente rasik kria sidauk rezolve. Bankada CNRT, PLP, KHUNTO no UDT/FM konsente konaba papél Parlamentu Nasionál iha konstituisaun repúblika no atu defende interese povu nian ne’ebé as liu, Tanba ne’e la autoriza Prezidente atu sai ba rai li’ur”, tenik iha deklarasaun polítika iha plenária ohin.

Hodi hatutan, desizaun ne’e la mai husi polítika hanesan agora  daudauk, maibé mosu husi órgaun soberanu ida ne’ebé foti daudauk dúvida barak konaba ninia integridade, mas CNRT, PLP, KHUNTO no UDT-Frente Mudança hakarak realsa katak desizaun ne’e rezultadu husi análize ne’ebé kle’an ba prosesu ne’ebé sei doko nasaun ida ne’e maski la presiza to’o iha ne’ebá, nune’e mai ita hamutuk hametin nasaun.

Tuir nia laiha sentidu liu, enkuantu formasaun VIII governu konstitusionál sei pendente hela, Xefe Estadu sai fali iha rai li’ur. Iha tinan kotuk PR kansela tiha nia dezlokasaun ba Nova Iorke, atu partisipa iha Asembleia Jerál ONU nian, ho razaun sei akompaña formasaun VII governu ninian, hodi bele lalais fó pose tuir kondisaun polítika iha tempu ne’ebá.

“Iha momentu ne’e, ita nia país no ita nia povu presiza Xefe Estadu iha ita nia rai laran, atu hatudu katak nia bele hatán ba responsabilidade konstitusionais ne’ebé iha ninia kabas leten hodi mós kontribui  ba estabilidade polítika, ba governadade estadu ninian, pás no sosiál,” nia sujere.

Hatán ba kestaun ne’e, Deputadu Antonino Bianco husi bankada FRETILIN defende, vizita xefe estadu hanesan atu hametin relasaun estadu tanba ne’e hatudu mós ita nia imajen.

“Labele fó rai rahun ba prezidente, sei dehan Prezidente impede formasaun governu ne’e la lós, oitavu governu agora daudauk forma ona, Prezidente ezerse kompeténsia hodi forma ona governu. Sei governu forma ona, entaun bele prepara programa no orsamentu, sei seidauk mai la’ós sala prezidente, sala husi inkapasidade governu atuál,” Antonino observa.

Hodi hatutan, PR atu vizita estadu iha kapasidade hanesan Xefe Estadu, “Sei ita boot sira deklara lakohi fó, imi nia imajen mós di’ak? Xefe Estadu atu vizita ba estadu ida atu hametin relasaun estadu sei imi la fó, imi nia imajen di’ak tan, di’ak iha rai laran no di’ak mós iha rai li’ur. Enkuantu PM Taur ninia diskursu furak, hametin relasaun entre estadu bilaterál no multilaterál”.

Deputadu Adriano do Nascimento husi bankada PD reforsa, sei taka dalan ba PR hodi hametin relasaun bilateral ho Portugal, uluk ita duni sai ona sira nia juis husi Timor-Leste, agora xefe estadu atu ba vizita ita taka dalan.

“Parlamentu ida ne’e atu sai ona opozisaun ba Prezidente Repúblika, uluk ita rejeita vizita estadu Prezidente Taur Matan Ruak, PD salva ho votus oituan, agora ita atu repete, parabéns ba ida ne’e sei ita halo duni ohin taka dalan ona Xefe estadu atu ba li’ur,” nia tenik.

Hodi konsidera desizaun ne’ebé AMP halo hanesan dezastre diplomátiku, Tanba juizu erradu no polítika má fé,

Tuir nia, atu halo programa ho orsamentu la’ós depende husi PR, maibé governu ho maioria parlamentár deside hodi lori ba PR.

Entretantu, PR husu autorizasaun ba PN atu halo vizita estadu ba Portugal no Cabo-Verde hahú iha loron 10 to’o 21 Jullu, maibé retifika fali katak la ba Cabo-Verde no ba de’it Portugal hahú iha loron 10 to’o 17 Jullu, ho razaun tanba situasaun iha rai laran.

To’ notísia ne’e tun, sidauk iha votasaun ba dezlokasaun PR.  Tuir ajenda plenária parte daruak sei hahú iha tuku 15:30.

Jornalista: Julia Chatarina

Editór : Manuel Pinto

2 KOMENTÁRIU

  1. Sistema govermental timor leste nian laos presidansial nebe ita tenke depende ba presidente, ita semi presidensial nebe kompetensia atu gere no halao programa balun ne iha governo nia liman PR hein halo aprova sai legalidade dt buat nebe mak hatoo husi governo….mais se kuando nunee bebeik bainhira los mk impasse politika ne hotu lalais….😣😏😣

HAKEREK NO HATÁN

Please enter your comment!
Please enter your name here