DILI (TATOLI)—Karta ne’ebé Primeiru-Ministru, Taur Matan Ruak, haruka ba Prezidente-Repúblika, Francisco Guterres Lú Olo iha semana ne’e katak tomade pose sei fó de’it ba Ministru Defeza, Brigadeiru-Jenerál Filomeno da Paixão de Jesus iha segunda (9/7).
Informasaun ne’e Ajénsia Tatoli asesu hosi Komunikadu Imprensa ne’ebé publika hosi Mídia Prezidénsia-Repúblika iha sesta lorokraik ne’e.
Tuir Dekretu Prezidente-Repúblika Nú. 21/2018 iha 5 Jullu 2018 katak, membru Governu sira ne’ebé atu simu pose iha segunda maka hanesan Ministru Estadu Konseleiru ba Primeiru-Ministru no Investimentu Estratéjiku, Kay Rala Xanana Gusmão, Ministru Defeza, Brigadeiru-Jenerál Filomeno da Paixão de Jesus no Sekretáriu Estadu ba Peska, Rogério Araújo Mendonça, maibé membru Governu rua seluk hanesan Xanana no Rogério seidauk disponível simu pose tanba razaun polítika.
Komunikadu imprensa ne’e hatutan, Xefe Governu no Xefe Estadu sei kontinua promove diálogu ne’ebé estabelesidu tiha ona hodi ultrapasa kestaun polítika relasiona ho indijitasaun personalidade iha VIII Governu Konstitusionál. (Jornalista: Xisto Freitas)
