Ministru Obras Públika, Salvador Soares dos Reis Pires. Imajen Media MOP

DILI, (TATOLI) – Programa loron 100 ba Ministériu Obras Públikas (MOP) mak halo ona estudu diagnóstiku hodi hatene kondisaun iha ministériu nia laran no bele halo planu atu haree sistema, mekanismu servisu ministériu nian, nune’e husi diagnóstika ne’e hetan problema.

Ministru Obras Públika, Salvador Soares dos Reis Pires, hatete problema sira mak diresaun balun laiha padraun prosedimentu operasionál (sop-standard operating procedure) no prosedimentu manuál (mop-manual of procedure).

Objetivu estudu diagnóstiku ne’ebé ami halo ne’e identifika problema lubun hanesan rekursu umanu, diresaun balun laiha sop no mop, ne’ebé halo koresaun servisu, tanba ne’e dalawain hetan dezentendimentu entre entidade iha ministériu nia laran nomós parte interesadu ne’ebé mak sira nia servisu liga ho ministériu obras públikas”, tenik ba jornalista sira iha nia kna’ar fatin, hafoin enkontru ho diretór jerál no nasionál sira, ohin.

Governante ne’e akresenta ninia parte mós identifika padraun konstrusaun sivíl ne’ebé mak presiza atu regula projetu fíziku ba investimentu kapitál governu nian, maibé sei falta investimentu kapitál privadu iha teritóriu tomak.

Nune’e nia dehan tan sei akumula dadus sira hotu hafoin bele halo ona avaliasaun no tenta atu estabelese mekanismu estrutura koordenasaun serbisu (fahe tarefa serbisu).

“Liu-liu halai ba lei orgánika ministériu nian, atu asegura kada diresaun jerál no nasionál ho unidade sira iha instituisaun públiku, atu sira nia papel servisu bele klaru”, katak.

Biban ne’e, nia mós informa ninia parte iha hanoin atu halo regulamentu importante ba planu urbanu ne’ebé siknifikativu atu asegura dezenvolvimentu urbanu hanesan edifísiu, abitasaun, infraestrutura bázika ne’ebé integradu, kualidade no sustentável.

“Ami hakarak harii ne’e sai meiu ida, nune’e bele organiza implementasaun kada komponente infraestrutura ne’ebé mak ita hala’o, atu ita nia investimentu kapitál ne’e integradu duni no kordena atu asegura ita nia investimentu kualidade iha aspeitu sustentabilidade”, akresenta.

Hodi haktuir tan, governasaun anterior, estabelese ona lejislasaun báziku ba ordenamentu teritoriál, tanba ne’e iha hanoin ba oin la’os Dili de’it mak sai prioridade, maibé fatin seluk mós tanba kresimentu demográfiku no distribuisaun massa infraestrutura fíziku ne’ebé boot tebes.

“Dili sai prioridade maibé la signifika munisípiu no área rurál sira la hetan atensaun, tanba ne’e planeamentu urbanu ne’e jerál ba sidade no kondisaun urbanu kada teritóriu tomak. Dili sai hanesan prioridade tanba problema oin-oin”, konklui.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here