Reuniaun Konsellu Superiór Defeza no Seguransa. Imajen Tatoli/Egas Cristovao
DILI (TATOLI) – Membru Konsellu Superiór Defeza no Seguransa (KSDS) apoiu ho unanimidade ezonerasaun ba Brigadeiru Jenerál, Filomeno Paixão.

Desizaun refere fó sai hafoin Prezidente-Repúblika, Francisco Guterres Lú Olo, konsulta membru Konsellu Superiór Defeza no Seguransa iha Palásiu Prezidente Nicolau Lobato, Bairru Pité, Dili, kinta ne’e.
“Tuir tramits legais, Brigadeiru Jenerál, Filomeno Paixão atu sai Ministru Defeza. Tanba ne’e, Konsellu Superiór Defeza no Seguransa trata duni asuntu ezonerasaun Brigadeiru Jenerál, Filomeno Paixão nian no sira konkorda para Prezidente-Repúblika bele halo Dekretu Prezidensiál para ezonera,” Reprezentante Xefe Kaza Sivíl Prezidénsia Repúblika, Gregório Sousa, dehan kestaun ne’e ba jornalista sira.
Reprezentante Xefe Kaza Sivíl Prezidénsia Repúblika, Gregório Sousa. Imajen Tatoli/Egas Cristovao
Tuir informasaun ne’ebé Ajénsia Tatoli asesu hosi fonte kredível iha Palásiu Prezidénsia katak probabilidade Ministru Defeza, Filomeno Paixão, sei simu tomada pose uluk molok Prezidente-Repúblika hala’o vizita Estadu ba estranjeiru iha 10 jullu mai ne’e.
Entretantu, molok reuniaun Konsellu Superiór Defeza no Seguransa, akontese enkontru entre Primeiru-Ministru, Taur Matan Ruak ho Prezidente-Repúblika, Francisco Guterres Lú Olo, kona-ba lista kandidatu membru Governu Da-Ualu Konstitusionál.
Hafoin reuniaun ramata, Primeiru-Ministru la disponível fó komentáriu kona-ba lala’ok lista kandidatu membru Governu ba jornalista sira.
Maibé, tuir Reprezentante Xefe Kaza Sivíl, Gregório Sousa hateten diálogu ba kestaun refere (lista kandidatu membru Governu) sei kontinua.
Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here