Primeiru-Ministru, Taur Matan Ruak bainhira simu Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur iha sala vip Palasiu Governu. Imajen Media PM

DILI, (TATOLI) – Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, relata atividade no proukupasaun forsa sira nia ba Primeiru-Ministru (PM), Taur Matan Ruak.

Bainhira dada lia ho jornalista sira, nia dehan prioridade iha atividade no preokupasaun forsa sira nia mak sira tenke moris di’ak.

“Primeiru prioridade mak forsa sira tenke moris di’ak, labele hamlaha, labele tabele iha mikrolet, labele kos, ida ne’e mak prioridade. Seluk ne’e ita bele rezolve”, tenik.

Alende ne’e, nia mós preokupa ho ministru defeza ne’ebé governu propoin ona ba Brigadeiru Jenerál, Filomeno Paixão, hodi bele hatan preokupasaun husi forsa sira.

“Ha’u hanoin katak ida-idak ho ninia área no hau hein hau ninia Ministru Defeza, tanba ohin loron ami nia Ministru Defeza laiha ona. Tanba buat hotu ami hato’o ba nia hodi implementa hamutuk ho konsellu ministru”, katak.

Nune’e nia hein reuniaun konsellu seguransa hodi hetan konsensu kona-ba kestaun Brigadeiru Filomeno.

“Orsida reuniaun konsellu superior defeza, aban ou bain rua tomada pose iha ona Ministru Defeza, bainhira mak lahatene mas ha’u rona katak Prezidente Repúblika atu halo vizita ba exterior hanesan vizita Estadu. Tanba ne’e dalaruma antes loron 10 tenke iha ona ministru defeza.

Kona-ba kestaun se mak sei troka pozisaun Brigadeiru Filomeno, tuir nia agora dadauk iha brigadeiru haat, nia sei fó alternativa ba governu atu hili entre naran hirak ne’e tanba hotu-hotu ho ninia misaun no serbisu.

Entretantu Brigadeiru nain haat ne’e mak hanesan Domingos Raul (Falur), Americo Ximenes (Sabika), Cornélio Ximenes (Maunana) no João Miranda (Aluk) ne’ebé Prezidente Repúblika, Francisco Guterres Lú Olo, promove ona sai Brigadeiru Generál iha loron 7 maiu.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here