Foto google.

DILI, (TATOLI) – Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL), liuhusi Asosiasaun Akadémika Estudantil (AAE), ho inisiativa estabelese atividade sokoru dahuluk hodi ajuda ema moras no fó asisténsia ba vítima sira ne’ebé hetan asidente ruma.

“Dezafiu boot mak ekipamentu seidauk kumpletu no agora dadaun ami hala’o kooperasaun ho AETL (Asosiasaun Enfermeiru Timor-Leste), sira apoiu manuquim ka boneka treinamentu no ekipamentu seluk ami sosa rasik nomós apoiu balun mai husi dosente sira”, hatete Koordenadór Primeiru Sokoru FMSS, Atanásio da Costa Flores, ba TATOLI iha Kampus Kaikoli, ohin.

Atanásio da Costa Flores hatutan fasilitadór susar tebes atu fasilita, tanba ninia parte foin mak iha fasilitadór na’in tolu, estudante mak barak.

Koordenadór realsa durante ezisténsia atividade ne’e sira hala’o programa hanesan fó treinamentu hanesan atendimentu kurativu kanek, tohar, nisik, mout, trauma nomós  Basic Life Support ka Cardiopulmonary resuscitation (CPR).

Tuir mai, semináriu kona-ba anatomia no fisiolojia (estuda kona-ba ema nia isin-lolon ho nia funsaun kada sistema idaidak). Semináriu kona-ba Patolojia no Patofisiolojia ( estuda kona-ba moras no prosesu moras ne’e mosu). Inklui, fó mós asisténsia ba atividade sira hanesan orientasaun akadémika iha UNTL, jogu FESDATIL (Federasaun Desportu Akadémiku Timor-Leste) no seluk tan.

“Treinamentu no semináriu ne’e hala’o fulan rua kada sábadu lorokra’ik tuku rua no estájiu semana rua iha ambulánsia”, tenik.

Estudante enfermajen ne’e esplika sokoru dahuluk hanesan ajuda ne’ebé mak fó assisténsia ba vítima no ema moras. Haree ba nesesidade ne’ebé mak iha mai husi komunidade tanba situasaun, realidade barak presiza asisténsia ne’ebé treinadu no profesionál.

“Ho nune’e liuhusi Asosiasaun Akadémika Estudantil-FMSS hakarak fó treinamentu ba estudante FMSS de’it iha área primeiru sokoru atu hasa’e sira-nia skills (abilidade) no mentalidade atendimentu iha terenu. Primeiru Sokoru, FMSS hala’o tinan ida ona”, akresenta.

Nia esplika inisiativa estabelese atividade ne’e iha vantajen mak estudante sira bele aprende teória no prátika nomós fó atendimentu diretamente ba vítima sira ne’ebé nesesita asisténsia primeiru sokoru; hasa’e sira-nia (estudante) koñesimentu, skills (abilidade) no mentadlidade.

Atanásio mós konfirma treinamentu no semináriu anatomia no fisiolojia responsabiliza husi nia parte rasik no kona-ba patolojia bo pato-psikolojia, asume husi estudante Medisina Jerál UNTL, Nívia Sarmento no Bonifácio Siljes.

“Esperansa ba ezisténsia primeiru sokoru ne’ebé ma kami ami iha, estudante FMSS nafatin manten amizade liuhusi atividade sira ne’e”, konklui.

Entretantu atividade ne’e rasik mós hetan apoiu másimu husi estrutura FMSS, dosente sira (profesór Maximiano Oqui, profesora Ana Leite no diretora eskola superiór enfermajen), nune’e mós hetan kolaborasaun husi médiku espesialista Cubano.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here