Fini Ikan. Foto/Google.

DILI, (TATOLI) – Ministériu Agrikultura no Peska (MAP) liuhusi Diresaun Jerál no Peska sei kontinua hasa’e produsaun ikan liuhusi dalan rua mak haki’ak ikan ne’ebé daudaun la’o hela no haree poténsia fatin sira liuliu bee-midar atu loke tan tanke para komunidade haki’ak ikan.

Diretór Jerál Peska MAP, Acácio Guterres, hatete MAP mós fó apoiu ba peskadór sira oinsá mak hasa’e produsaun ikan para bele hamenus má nutrisaun no hadi’a sira-nia moris.

“Foufoun ita harii tanke sira ne’e mak ita apoia fini, hahán, depois ida ne’e abitante (komunidade) balun komesa la’o mesak ona no balun hetan rezultadu di’ak ne’ebé ita tulun nafatin”, Acácio dehan iha Komoro, ohin.

Dirijente ne’e afirma ministériu iha ikan-oan ne’ebé prodús iha sentru produsaun fini iha Ermera-Gleno, Same, Vikeke, Maliana no Maubara ne’ebé hetan apoiu husi Korea International Cooperation Agency (Koica).

“Tanba fini ikan agora barak liu, ministru ko’alia ona atu husik ikan iha lagoa sira ne’ebé iha Timór para tau iha ne’ebá depois liu tiha fulan haat ka lima maka abitante sira bele bá kaer ba sira-nia nesesidade”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here