Aprezentasaun profile ba ANAAA. Foto: Media Komunikasaun UNTL

DÍLI, (TATOLI)-Fakuldade Filozofia no Siénsia Umana (FFSU), Siénsia, Universidade Nasionál Timor Lorosa’e (UNTL), tuir media komunikasaun UNTL, ohin, katak hahú ona enkontru dahuluk hodi prepara ba avaliasaun husi Ajénsia Nasionál ba Avaliasaun no Akreditasaun Akadémika (ANAAA).

“Ita konvida mós Proreitór Asuntu Akadémiku no dekanu balun mezmu ekipa tékniku husi ANAAA nian partisipa ona, ami hein katak sai dokumentu provizóriu ida maibé fakuldade nafatin presiza atu hadi’ak liután,” dehan dekanu Martinho Boromeu iha sala video konferénsia, Kampus Sentrál UNTL.

Tuir Dekanu Martinho Boromeu katak fakuldade hala’o ona nia papel dezde 2012 bazea ba pilár tolu; ensinu, peskiza, estájiu sosiál, no koperasaun iha akadémiku nian maibé presiza hetan avaliasaun.

Iha fatin hanesan, ekipa téknika husi ajénsia ANAAA nian, Dirce Belo hateten baibain avaliasaun ne’e adekua ba kursu ne’ebé graduadu barak ona.

“Maibé, ami sei hato’o ba Konsellu Diretivu hodi hetan aprovasaun tanba ba ha’u ne’e ita bele hala’o se kursu ne’e preparadu ona,” akresenta reprezentante ekipa téknika ne’e.

 Enkuantu Pro-reitór Asuntu Akadémika, profesór Marcos António Amaral agradese ba Ekipa tanba bele koopera hodi realiza eventu ne’e.

“Ami sei iha enkontru alargada ida iha (5/7), relasiona ho ita-boot sira-nia vizita mai iha loron 10 jullu ne’e, hodi husu informasaun ba fakuldade oinsá prienxementu relatóriu iha akreditasaun ba faze datoluk nian,” informa Pro-reitór Asuntu Akadémika ne’e.

Iha sorumutuk ne’e, dekanu FFSU aprezenta mós profile fakuldade nian ba partisipante sira, inklui difikuldade sira hafoin ekipa tékniku sira Ajénsia Nasionál ba Avaliasaun i Akredisaun Akadémika hato’o mós rekomendasaun sira hodi deskute.

Bazea ba kritériu universidade nian katak fakuldade ida mínimu iha departamentu tolu. Tanba ne’e atualmente fakuldade ne’e foin eziste departamentu ida. Nune’e, hatuur ona iha planu fakuldade nian katak sei harii tan departamentu rua hanesan kursu istória no jeografia, nomós kursu Psikolojia.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here