Embaixadora dezignadu Estadu Unidus Amérika (EUA) ba Timor-Leste, Kathleen M. Fitzpatrick

DILI (TATOLI)-Embaixadora Estadu Unidu Amérika (EUA), Kathleen M. Fitzpatrick, informa katak EUA kontinua pronto ajuda Timor-Leste (TL), iha ámbitu governu foun, ne’ebé lidera husi Primeiru-ministru, Taur Matan Ruak (TMR).

“USA apoia TL dezde kedas indepedénsia, apoiu partidu polítiku sira hotu. Agora serbisu efetivu kontinua ho governu agora, ho kooperasaun ne’ebé la’o tiha ona,” dehan diplomata Americana, Kathleen M. Fitzpatrick, perante jornalista sira, iha fim-de-semana ne’e, iha Farol-Díli.

Embaixadora ne’e informa katak apoiu sira ne’ebé mak EUA halo ona ho governu Timor-Leste, iha kontestu demokratizasaun TL nian, mak liuhusi USAID; ajuda partidu polítiku sira, hodi polítika sir abele hala’o sira-nia papel di’ak liutan.

Tuir mai mak ajuda feto parlamentár sira, hodi halo mós sira-nia papel di’ak liutan inklui apoiu ba setór judisiáriu. “Ba autór judisiáriu sira atu bele hala’o sira-nia servisu di’ak liutan,” dehan embaixadora ne’e.

Apoia TL Adere ba ASEAN

Kona-ba interese TL nian atu sai membru ho direitu plenu ba ASEAN (Association of South East Asian), embaixadora Kathleen M. Fitzpatrick hateten katak EUA apoiu TL nia interese adezaun ne’e.

“EUA nia pozisaun mak apoiu interese Timor-Leste nian atu sai membru ba ASEAN, maske nune’e desizaun hotu depende ba nasaun membru 10 ne’ebé mak hamahan aan iha ASEAN ne’e,” akresenta embaixadora Kathleen M. Fitzpatrick.

Membru direitu pleno ASEAN nia mak Brunei Darussalam, Kambodia, Indonézia, Laos, Malázia, Burma, Filipina, Singapura, Tailándia no Vietnam.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here