Prezidente Autoridade Nasionál Petróleu no Minerál (ANPM), Gualdino da Silva.

DILI, (TATOLI)- Prezidente Autoridade Nasionál Petróleu no Minerál (ANPM), Gualdino da Silva, informa kompañia Timor Resources no Timor Gap sei halo levantamentu dadus sízmiku iha área kontratu A no C ne’ebé sei hala’o iha tempu badak maka husi agostu to’o outubru 2018.

Antes atu halo peskiza ida ne’e maka ANMP no instituisaun relevante sira ho kompañia Timor Resources no Timor Gap tuur hamutuk atubele mellora liután kooperasaun ne’ebé mak tenke tau hamutuk ho empreza atubele iha entendimentu hanesan kona-ba oinsá mak atu aproxima, implementa programa peskiza ne’ebé sei hala’o iha tempu besik.

“Iha tinan kotuk Governu deside ona atu sira (Timor Resources) hamutuk ho sira-nia parseiru Timor Gap atu hala’o sira-nia atividade iha área kontratu A ho C hola fatin iha Kovalima no Manufahi”, Gualdino hato’o ba jornalista sira iha salaun Ministériu Finansa Aitarak-Laran,ohin, iha ámbitu perparasaun ba levantamentu dadus sízmiku 2D iha área kontratu nian.

“Planeadu ona ba agostu to’o outubru sei iha atividade peskiza sízmiku pur volta kilómetru 300 ne’ebé mak sira sei halo. Tanba ne’e mak sei envolve mobilizasaun ekipamentu ne’ebé presiza koordenasaun husi fatin bá fatin husi entidade Governu tomak atubele iha entedimentu di’ak nomós hakarak atu koordenasaun la’o di’ak, la’ós de’it husi ANPM, ita presiza kooperasaun husi instituisaun relevante ne’ebé mak iha ba susesu projetu ida ne’e”.

Hafoin husi levantamentu dadus ida ne’e maka iha tinan oin sei kontinua nafatin ho koordenasaun ida ne’e atu prepara ba perfurasaun iha fatin ne’ebé hanesan.

“Tanba perfurasaun ne’e sei halo iha tinan oin, sei iha investimentu boot tanba ne’e molok halo sira presiza estuda didi’ak dadus ne’ebé iha ona no se nesesáriu tuir kontratu ne’ebé iha tenke halo peskiza sízmiku tan. Ida ne’e mak ita koordena hela atu halo iha agostu to’o outubru”.

Sobre fatin espesífuku ba perfurasaun nian daudaun ne’e seidauk tanba sei bazea ba rezultadu sízmiku. “Ita iha ona hanoin ruma, maibé ita só afirma liután kuandu rezultadu sízmiku ne’e la’o ona, tanba sira sei halo fulan tolu no mínimu fulan tolu sei halo prosesamentu dadus sira ne’e no fulan tolu hanesan sei halo interpretasaun dadus sira ne’e mak foin bele hatene, entantu buat ne’ebé sertu perfurasaun sei halo iha kontratu rua ne’e nia laran”.

Gualdino hatutan mina-matan ne’ebé hatene husi dadus pasadu nian iha lubuk ida tanba iha tempu Portugés iha perfurasaun pós-peskiza ne’e mós lubuk ida.

“Maibé sira ne’e hotu la bá produsaun, iha poténsia mina-matan ita identifika ona, ne’ebé hein lai dadus sízmiku ida ne’e hotu, ita afirma loos ona ita atu fura ne’e hira-hira, entantu ita hatene katak ita sei iha perfurasaun. Ita sei fura posu iha área rua ne’e depois de sízmiku ne’e hotu sira halo prosesa ba dadus, interpreta, husi ne’e hatene ona katak atu bá tau posu ne’e iha ne’ebé loos, tan posu ida ne’e mínimu bele to’o dólar millaun resin. Tanba ne’e tenke haree didi’ak para gasta osan mós tuir nia dalan”.

Lee mós :

Governu Selebra Kontratu Ho Empreza Timor Recourses

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here