DILI, (TATOLI)-Tékniku Autoridade Nasionál Petróleu no Minerál (ANPM) kontinua halo monitorizasaun ba bee iss mina-rai iha área tasi-tolu ne’ebé mak kompañia China Wu Yi Limited hetan bainhira ke’e bee dalan kuaze métru tolu iha fatin ne’e.
Prezidente ANPM, Gualdino da Silva, hatete kada semana ida ka rua tékniku sira haree nafatin fatin ne’e no observa mina ne’e natureza duni ka la’e atu nune’e bele lori bá laboratóriu.
“Se nia natureza duni entaun nia sei sa’e nafatin, ema kuru tiha mós sei sa’e nafatin, pur enkuantu seidauk iha sinál seluk, maibé ami sei kontinua halo monitorizasaun”, Gualdino afirma iha salaun Ministériu Finansas Aitarak-Laran, ohin.
Hatutan bainhira iha buat ruma maka sei halo medida para rekomenda ba na’in-ulun sira liuliu ba ministériu relevante atubele trata ida ne’e tanba ne’e besik loos dalan.
“Entantu ita seidauk iha informasaun foun, se bá oin iha mudansa ruma maka ita sei anúnsia ba ministériu relevante”.
Jornalista : Maria Auxilidora
Editór : Manuel Pinto
