Eis Prezidente-Repúblika (PR), José Ramos Horta

DILI (TATOLI)—Eis Prezidente-Repúblika (PR), José Ramos Horta, sujere ba atuál Prezidente-Repúblika, Francisco Guterres Lú Olo, atu hamutuk ho Governu tau matan ba situasaun traballadór sira iha Korea Súl.

Tuir Horta, defikuldade ne’ebé oras ne’e traballadór timoroan sira infrenta iha Korea Súl maka falta preparasaun iha língua.

“Ita bele hetan timoroan atus ba atus tan atu ba Korea maibé preparasaun ba língua no kultura koreana tenke preparasaun halo didi’ak. Ne’e duni, ha’u hateten ba Prezidente Repúblika ko’alia ho Primeiru-Ministru para haree didi’ak ida ne’e,” nia hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin enkontru ho Xefe Estadu Lú Olo.

Nia esplika katak ho preparasaun ne’ebé ladún di’ak halo traballadór sira menus intende língua Korea bainhira halo komunikasaun ho koreanu sira iha serbisu fatin nomós seidauk apár ho kultura koreanu defikulta traballadór sira susar tebes halo interasaun ho koreanu sira.

Horta mós hateten relasaun ho Korea Súl importante teb-tebes, tan ne’e, Timor tenke buka aumenta relasaun ho Korea Súl.

“Iha rai sira iha Ázia ne’e, rai ida ne’ebé simpatia ho Timor kle’an teb-tebes maka Korea Súl. Tanba, sira mós uluk ema koloniza sira ka invade sira hanesan Timor, entaun sira simpatia loos ho Timor,” nia afirma.

Iha oportunidade ne’e, Diplomata Seniór afirma, Korea Súl preokupa ho traballadór timoroan ilegál barak iha ne’ebá (kuaze 400), ne’e duni, nia husu Governu atu tau-matan ba kestaun refere.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here