Seremonia lansamentu kampaña nasionál imunizasaun. Imajen/MS

DILI, (TATOLI) – Governu liuhosi Ministériu Saúde lansa ona kampaña nasionál ba imunizasaun ho objetivu hasa’e imunidade labarik sira nia hodi hasoru moras sarampu, rubela no polio.

Vise Ministra Saúde, Elia Antónia de Araújo dos Reis Amaral, iha ninia intervensaun husu inan aman no família hodi hakbesik án ba postu imunizasaun ne’ebé prepara ona, ho oan sira hodi hetan imunizasaun.

“Timor-Leste ohin hahú ho atividade kampaña imunizasaun nasionál ba sarampu, rubella ho polio iha teritoria tomak. Nune’e husu ba inan ho aman ka família sira hotu keta haluha lori oan sira, ho idade tinan 5 mai kraik atu hakbesik án ba postu imunizasaun ne’ebé besik hodi hetan imunizasaun”, tenik iha biban seremónia lansamentu kampaña nasionál imunizasaun iha resintu administrasaun munisípiu Dili, ohin.

Parte seluk Espoza Prezidente Repúblika, Cidalia Lopes Nobre Mouzinho Guterres, reforsa hodi husu ba komunidade sira hodi lori labarik sira hodi hetan vasina nune’e sira bele proteje sira nia án.

“Ha’u hakarak hatutan liu tan, ba inan-aman, familia no komunidade sira tomak atu lori labarik sira ne’ebé ho idade tinan lima mai kraik hodi hakbesik ba fasilidade saúde no postu imunizasaun sira ne’ebé besik hodi hetan vasina. Tanba bainhira labarik sira simu vasina sarampu, rubella no polio sira sei proteje sira nia án rasik no mos membru komunidade sira husi moras hirak ne’e”, tenik.

Hodi louva no apresia profesionál saúde sira nia servisu hodi serbí povu. “Ha’u hatene katak ita boot sira nunka sura kolen, maibé iha oportunidade neé ha’u hakarak husu atu ita boot sira kontinua halo servisu ho badinas liu tan nune’e bele salva ita nia jerasaun sira iha Timor-Leste. Ba Servisu di’ak no dedikasaun tomak ne’ebé ita boot sira nu’udar profesionál saúde hala’o iha kampaña imunizasaun nasionál ne’e hodi povu tomak nia naran, ha’u hato’o obrigadu wain”.

Entretantu, sarampo nu’udar moras dahuluk no únika moras ne’ebé mak konsege atua iha mundu ne’e. Nune’e asaun hanesan kampaña hanesan rezultadu husi kompromísiu ne’ebé boot, no esforsu maka’as husi entidade sira iha kampaña boot.

Enkuantu iha tinan 2011 no 2014, labarik sira barak hetan moras sarampu no balun mate tanba la vasina sarampu. Sarampu bele halo komplikasaun sira ne’ebé grave, liuliu labarik sira ho mal-nutrisaun bele hetan pneumonia, defisiensia no bele de’it halo mate.

Virus rubella iha ona Timor-Leste no dalabarak sosiedade haree rubella hanesan moras kmaan, maibé bele provoka komplikasaun grave bainhira kona inan isin rua sira, ne’ebé bele halo bebe abortu ka moris mai mate. Se karik konsege moris, bebe bele moris mai ho sindrom rubella konjenita no bele provoka moras fuan, danus serebrál, tilun diuk no matan delek.

Entretantu kampaña imunizasaun nasionál ba sarampu, rubella no polio ne’e realiza iha teritóriu tomak iha postu imunizasaun ba labarik ho idade tinan lima ba kraik, hahú loron 2 to’o 14 jullu 2018.

Atividade ne’e realiza tanba iha koperasaun di’ak entre ministériu saúde ho parseiru dezenvolvimentu  saúde sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here