Xanana: Prezidente Repúblika Maka Bele Fó Sai PM Indijitadu

0
836
Prezidente Koligasaun Aliansa Mudansa Ba Progresu (AMP), Kay Rala Xanana Gusmão

DILI, (TATOLI) – Prezidente Aliansa Mudansa ba Progresu (AMP), Kay-Rala Xanana Gusmão, hateten Prezidente Repúblika maka bele fó sai Primeiru- Ministru (PM) ne’ebé AMP indijita ona.

Tuir Xanana, Prezidente Repúblika maka boot liu, ne’e duni, nia (Prezidente) maka iha kompeténsia tomak fó sai naran Primeiru-Ministru Indijitadu.

“AMP agora indijita ona Primeiru-Ministru maibé Prezidente Repúblika sei haree hela oinsá maka bele nomeia”, Xanana hato’o ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba indijitasaun Xefe Governu ba Oitavu Governu.

Nia dehan enkontru ho Xefe Estadu ne’e rápidu teb-tebes (09.00 to’o 09.30). Signifika katak hanoin no hakarak hanesan.

“Hanoin hanesan ba kalendáriu tomada pose karik. Ida ne’e maka enkontru lalais de’it ne’e. Se lae, ita deskuti kle’ur”, katak tan.

“Imi (jornalista-red) haree ami foin tama sai kedas. Ne’e katak ambiente polítika ne’ebé ita fó hanoin ba malu ne’e di’ak. Ami agradese tebes Prezidente Repúblika nia despozisaun no preokupasaun ba prosesu polítiku ne’ebé la’o dadauk iha ita nia rai”, Xanana hatutan.

Tuir informasaun ne’ebé Ajénsia Tatoli asesu hosi fonte kredível ida iha AMP katak Taur Matan Ruak mak sei lidera orgaun ezekutivu.

Jornalista: Xisto Freitas

Editora: Rita Almeida

HUSIK IDA HATÁN