V Lejizlatura Tenke Dignifika Mandatu Konstitusionál

0
797
Deputadu hosi bankada FRETILIN, Mari Alkatiri ho Francisco Branco.

DILI (TATOLI)—Prezidente Parlamentu Nasionál, sesante Aniceto Guterres husu ba deputadu lejizlatura dalimak atu dignifika mandatu konstitusionál, hatene interpreta no respeita interese nasionál ne’ebé as liu “do que” interese privadu, grupu ka interese partidu ninian.

Prezidente Parlamentu Nasionál sesante, Aniceto Guterres

“Kuaze deputadu IV lejizlatura ohin marka prezensa iha ne’e. maioria mak re-eleitu, ha’u hato’o ha’u nia parabéns tanba konsege renova fiar hosi povu, atu mai reprezenta iha Parlamentu Nasionál. Maibé ha’u mós hakarak apela ba sira, mai ita ida-idak halo reflesaun kle’an atu haree esperiénsia hosi IV lejizlatura nia lalauk polítika ne’ebé ladún kontribui atu hametin demokrasia,” Aniceto afirma iha nia diskursu iha Parlamentu Nasionál, ohin.

Ho nune’e nia husu V lejizlatura ho nia deputadu sira tenke hatene dignifika mandatu konstitusionál, tau interese nasionál mak as liu interese privadu, Timor-Leste presiza liu estadista no polítiku sira ne’e la’o ho sentidu estadu.

Iha fatin hanesan mós Aniceto uza oportunidade hodi fó parabéns ba komunidade musulmanu sira ne’ebé iha tempu besik sei selebra loron Idul Fitri.

Entretantu membru deputadu foun kompostu husi Partidu Demokrátiku (PD) ho kadeira 5, Frente Revolusionária Timor-Leste Independente (FRETILIN) ho kadeira 23, koligasaun partidária Aliansa Mudansa ba Progresu (AMP) ho kadeira 34 no koligasaun partidária Frente Dezenvolvimentu Demokrátiku (FDD) ne’ebé foin hetan asentu iha lejizlatura ne’e hetan kadeira 3.

Iha V lejizlatura, opozisaun iha Parlamentu Nasionál (PN) mak FRETILIN, PD no FDD, enkuantu AMP ne’ebé tuir planu fahe ba bankada tolu, sira mak na’in ba oitavu governu.

 Jornalista: Julia Chatarina

Editór : Manuel Pinto

HUSIK IDA HATÁN