Turista Sira Hasoru Problema Iha Kualidade Servisu

0
359
Foto/Google.

DILI, (TATOLI) – Administradór Sentru Informasaun Turístika (SIT), Ministériu Turizmu, António da Silva, hatete SIT hetan sujestaun (input) husi turista sira liuliu ba problema tolu iha Timor-Leste mak kualidade servisu (quality service), konetividade no parseria entre setór públiku no privada nian.

“Kualidade servisu iha ospitalidade, restaurante, kualidade rekursu umanu, jestaun públiku ba lixu, no tuirmai mak konetividade.  Ita-nia merkadu nia poténsia boot mak Austrália, mas ita hatene aviaun karun nomós konetividade transporte lokál sira ne’e”, dehan nia ba Tatoli iha Lecidere, ohin.

“Ha’u simu informasaun barak husi turista sira dehan sira sa’e bis bá to’o iha Lospalos hakarak bá Jako, agora atu bá Jako mak sai obstákulu ba nia tanba transporte nia oráriu ladún fiksu, nia tenki buka rasik, ne’e mak dalaruma impede sira atu halo konesaun bá fatin interesante sira”.

Tanba ne’e parseria entre setór públiku no privadu liuliu atendimentu ajénsia viajen sira tenke hasa’e liután iha oin mai.

“Tanba setór privadu mak front line entaun Governu hanesan reguladór tenke sai parseiru di’ak ba sira para dudu sira bá oin, nune’e bele hamosu ona empreededór ki’ik sira”.

António dehan SIT atu fasilita informasaun ba turista sira no ema doméstiku entaun bainhira fasilita tiha tende iha produtu ida ne’ebé fó maka liuhusi parseria.

“Planu aban-bainrua sei harii departamentu kooperasaun no atendimentu serbisu públiku entaun nia kooperasaun ne’e ho setór privadu sira liuliu kooperativa sira ne’e nomós  fornese serbisu turístiku hanesan gia, fasilita transporte no fasilita aluga karreta ka bisikleta ruma iha ne’eba”.

Hatutan Timor-Leste bele iha tasi no fatin ne’ebé furak bainhira kualidade servisu laiha mak atu enkoraja ema mai susar tebes.

“Entaun saida mak ita halo maka kooperasaun entre ajénsia Governu sira tanba turizmu ne’e interligadu. Kona-ba atendimentu servisu iha treinamentu vokasionál ami tenke hamutuk fali ho edukasaun, sentru formasaun profisionál sira, NGO seluk ne’ebé serbisu ba área ne’e no bá futuru sei hamutuk tanba ne’e indetifika hanesan lakuna ne’ebe presiza hadi’a”.

Aleinde ne’e sujestaun seluk ne’ebé hato’o katak oinsá mak Timor-Leste dezeñu pakote viajen nian, fatin rekresaun tenke jere didi’ak, infraestrutura bázika hanesan sintina públiku tende di’ak nomós halo variedade produtu viajen nian.

Jornalista: Maria Auxiliadora

Editora: Rita Almeida

HUSIK IDA HATÁN