Selu Taxa Bele Uza Sistema Pagamentu Eletróniku

0
179

DILI (TATOLI) – Governu liuhosi Komisaun Reforma Fiskál (CRF-sigla portugés) hahú aplika ona sistema pagamentu eletróniku ho kartaun Banco Nacional Ultramarino (BNU) ba pagamentu taxa no impostu, hahú loron 11 Juñu 2018.

Tuir informasaun ne’ebé divulga husi CRF, Sistema pagamentu ne’e, konsidera bele redús tempu iha prosesu importasaun no esportasaun, fasilita komérsiu, no suporta estabelesimentu administrasaun alfándega ne’ebé mak modernu no transparente.

Nune’e mós bele aumenta efisiénsia kolesaun reseita no alerta ba importadór no públiku sira katak kolesaun reseita liuhosi pagamentu hirak ne’e sei depozita hotu ba kofre estadu.

Hahú husi loron 11 Juñu, bainhira selu taxa ba alfándega, koima ruma, no impostu iha aeroportu, bele uza kartaun BNU ou kartaun visa hodi halo importasaun uza transporte aéreu no deklarasaun alfándega sei prosesu uza automated system for customs data (sistema asycuda world).

Atu halo importasaun no esportasaun, bele uza kartaun rua ne’e hodi selu taxa ba alfándega, koima, no impostu ba sasán negósiu bainhira to’o ho ró liuhosi servisu autoridade alfándega sentrál. Nune’e alfándega iha portu so bele hasai sasán bainhira importadór submete ona deklarasaun alfándega ne’ebé uza sistema asycuda world no aprezenta resibu husi banku ne’ebé uza pagamentu eletróniku.

Tranzisaun husi faze ida ne’e, sei hahú husi loron 11 Juñu to’o 30 Jullu 2018, tanba ne’e bainhira atu halo importasaun no esportasaun mak sidauk iha kartaun hodi halo tranzasaun, bele uza cash no selu iha sukursál BNU.

Agora daudauk, banku sira iha ona sistema pagamentu eletróniku rasik maibé sidauk bele halo koneksaun ho sistema pagamentu banku seluk, enkuantu Banco Central Timor-Leste (BCTL) lakleur tan sei servisu hodi implementa sistema transferénsia nasionál nune’e bele permite sistema pagamentu eletróniku ba kada banku hodi bele simu pagamentu husi kartaun banku seluk.

Governu liuhosi Ministériu Planu no Finansa (MPF) servisu hela ho BCTL atu bele hetan asesu husi sistema pagamentu seluk hanesan internet banking.

Entretantu sistema asycuda world hanesan sistema ne’ebé alfándega sira utiliza nune’e MPF iha responsabilidade atu instala iha servisu  autoridade portu no aeroportu, transporte, no kuarentena. Sistema ne’e nu’udar janela únika hodi fasilita kliente sira liu-liu setór privadu.

Sistema ne’e hetan aprovasaun iha loron 25 Abríl  2017 liuhosi reuniaun Konsellu Ministru (KM) komesa implementa iha alfándega iha loron 3 Maiu 2017.

Jornalista: Julia Chatarina

Editór : Manuel Pinto

 

HUSIK IDA HATÁN