SEKOMS-KI Diskute Tékniku Operasionál Komunikasaun 

0
131
Foto ofisiál KI ho SEKOMS. Foto TATOLI: Egas Cristovão

DILI (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, informa nia parte halo ona diskusaun kona-ba kestaun tékniku, operasionál oi tuan kona-bá area komunikasaun nian ho Konsellu Imprensa (KI).

Area hirak ne’ebé SEKOMS diskute ho KI mak hanesan ko’alia kona-ba, papél RTTL (Rádiu no Televizaun Timor-Leste) nian no papél rádiu komunidade sira nian. Aleinde ida ne’e, Sekretáriu Estadu Komunikasaun Sosiál ho nia ekipa, ba oin, hamutuk ho Konsellu Imprensa nó mós ajénsia no instituisaun relevante, hamutuk atu hahú ona ko’alia kona-ba proposta lei ka elaborasaun lei kona-ba rádiu televizaun ninian.

“Ne’ebé, maizumenus ida ne’e mak ohin, iha nivel sei koñese malu, depois ba oin ami ko’alia mais detalla, depois ita-boot sira (jornalista sira) rona rasik,” sekretáriu estadu Merício “Akara” informa ba jornalista sira iha ámbitu vizita ba edifísiu Konsellu Imprensa (KI), Ohin.

Mericio garante, sei fó fiar ba KI mantein sira-nia serbisu ho di’ak, professional. “Saida mak la’o di’ak, pozitivu, dehan tiha ona kolega (KI, CRC-red) sira iha ne’e, mantein servisu ho professional. Satan ita-nia Konsellu Imprensa, ne’e independente, ita sei asegura ida ne’e i ita fó fiar ba sira para mantein sira-nia serbisu ho di’ak, professional; servisu jornalizmu ne’e reforsa, ita hothotu nia kna’ar ne’e la’o ho hakmatek I la iha ta’uk. Se kódigu étika jornalizmu ne’e iha, jornalista sira iha liberdade tomak atu hala’o.”

Aleinde ida ne’e hatán ba ajénsia TATOLI kona-ba oinsá tau konsiderasaun ba preokupasaun sira husi KI no seluk, Sekretáriu estadu Merício “Akara” esplika, media sira hatene ona kna’ar governu, portafóliu sekretáriu estadu, ministru, iha tempu badak sei aprova lei orgánika.

“Ne’ebé, prosesu normál ne’e mak sei la’o. Ha’u ohin dehan ida ne’e ba prezidente (KI) kontestu ida ne’e ba tinan lima. Kolega balun, hahú 100 dias, ami prefere liu kontestu tinan lima para ita la’o ho naneik maibé pasti (serteza) di’ak liu duke tanba ema dehan, ita halai sobu tuun sa’e, kontra lei tan, ita tama hotu Komarka Bekora. Ita foku ba ita-nia servisu,” Akara hatán.

Iha fatin hanesan Prezidente KI informa katak durante sorumutu, sira ko’alia kona-ba papél RTTL (Rádiu no Televizaun Timor-Leste) nian no papél rádiu komunidade sira nian. Katak, oinsá iha koordenasaun entre órgaun komunikasaun sosiál sira, atu rádiu komunidade iha foho mós bele hetan informasaun atuál kona-ba desizaun polítika saida mak governu foti iha nasionál.

Atu nune’e bele prienxe direitu públiku nian atu bele hetan informasaun. Katak, direitu ne’e la’ós ema sira iha sidade de’it maibé ema foho sira mós. “Ida ne’e mak preokupasaun ne’ebé mak ami hato’o. Ami hato’o mós kona-ba atensaun maka’as I urjente husi governu nia ba RTTL; hanesan órgaun ne’ebé harii tanba mandatu husi konstituisaun ninian,” nia haktuir.

“Entaun, governu mós tenke tau-matan atu halo investimentu ne’ebé sufisiente ba infraestrutura Rádiu no Televizaun Timor-Leste ninian nó mós ba rekursu umanu, liliu ba iha área jestaun, atu nune’e redignifika estatutu ne’ebé iha hanesan órgaun serbisu públiku nasionál. Ida ne’e Konsellu Imprensa ninia preokupasaun,” prezidente KI informa.

Lider másimu KI mós informa tan Preokupasaun seluk tan ne’ebé sira hato’o ba Sekretáriu Estadu Komunikasaun Sosiál ho nia ekipa, ba oin, mak Konsellu Imprensa nó mós ajénsia no instituisaun relevante, hamutuk atu hahú ona ko’alia kona-ba proposta lei ka elaborasaun lei kona-ba rádiu televizaun ninian; buat ne’ebé oras ne’e ita seidauk iha ka iha Indonézia nia lian dehan Undang-Undang Penyiaran (lei transmisaun).

“Ita seidauk iha. Ida ne’e mak ami informa ba sekretáriu estadu i sekretáriu estadu prontu atu ko’alia; hanesan ohin hateten katak sei hein hela lei orgániku governu da-walu nian. Bainhira buat ne’e la’o ona, enkontru regulár la’o ona atu trata planu asaun ba asuntu sira ne’e,” akresenta prezidente Virgílio Guterres.

Hafoin ne’e, Prezidente KI mós, entrega relatóriu KI nian ba SEKOMS inklui planu ne’ebé mak KI planeia ona sei halo iha futuru.

Jornalista: Rafy Belo

Editór : Manuel Pinto

HUSIK IDA HATÁN