SEJT Kurizé Ona Matéria Ezame Kandidatu Traballadór Hamutuk 7.255

0
94
Sekretáriu Estadu Juventude no Traballu (SEJT), Nívio Leite Magalhães.

DILI (TATOLI)-Sekretáriu Estadu Juventude no Traballu (SEJT) hahú ona korresaun matéria ezame ba kandidatu traballadór hamutuk 7.255 ne’ebé hakarak serbisu iha Korea. Liuhusi korresaun ne’e bainhira konkorrente sira pasa maka sei hakat hodi  tuir kursu lia-Korea nian depois selesiona tan atu bá serbisu iha nasaun ne’e.

SEJT, Nívio Leite Magalhães, hatete teste ne’e halo iha 17 no 18 Abríl foin lalais ne’e, maibé lá halo korresaun tanba iha hela períodu kampaña nian no besik ba eleisaun.

“Ita lakohi ema balun bele hanoin ka iha presaun katak hakarak utiliza oportunidade iha tempu ne’ebá ba interese partidu nian. Ha’u hanoin ita hotu tenke iha sentidu Estadu, buat ne’ebé Estadu nian ita labele kahur ka hatún nia valór hodi hasa’e fali interese grupu, família nomós ba partidu. Tanba ne’e mak ami adia prosesu hotu no ohin loron forma ekipa interdiresaun hodi halo korresaun”, Nivio katak iha Kaikoli horisehik, hafoin hatún despaxu ba Diretór Jerál SEJT, Paulo Alves, hodi komesa halo serbisu.

Nune’e Nivío husu ba ekipa ida ne’e atu korrije ho justu, transparente nomós asegura katak halo korresaun ne’e loos no hasees aan husi interese ruma.

“Ita tenke tane aas interese povu no nasaun nian no bá oin ami hein katak prosesu ida hanesan ne’e maka implementa duni ba programa sira ne’e tanba ita presiza asegura programa ida ne’e loke ba timoroan hotu no só teste mak bele deside ema ida bá ka labá”.

Tanba ne’e horisehik ekipa komesa halo ona korresaun no sei la’o másimu semana ida nia laran devidu (tanba) ida ne’e sai parte ida iha rekomendasaun ne’ebé SEJT sei entrega ka hato’o ba membru Governu foun.

Bainhira rezultadu husi korresaun ne’e iha ona maka sei anúnsia kedan ba públiku tanba sira merese atu hatene implementasaun programa Governu nian tanba Governu iha ba povu no sei fó sai husi mídia nasionál no SEJT nian.

Jornalista : Maria Auxiliadora

Editór : Manuel Pinto

HUSIK IDA HATÁN