PR Deside Pose Oitavu Governu iha Loron 22 Juñu

0
1816

DILI (TATOLI)—Membru Oitavu Governu Konstitusionál ne’ebé Primeiru-Ministru Nomeiadu, Taur Matan Ruak, aprezenta ba Prezidente Repúblika, Francisco Guterres Lú Olo, hamutuk ema na’in 39 ne’e, Prezidente Repúblika deside sei fó pose iha loron 22 Juñu.

Tomada pose ba faze tuir mai kontinua hala’o bainhira membru Governu seidauk kompletu.

Enkuantu ohin (20 Junu), Prezidente Repúblika nomeia ona Primeiru-Ministru Indijitadu, Taur Matan Ruak, liuhusi dekretu Prezidente Repúblika nú. 18/2018.

Informasaun ne’e hato’o hosi Prezidente Repúblika, Francisco Guterres Lú Olo, liuhusi konferénsia ba imprensa ne’ebé hala’o iha salaun Palásiu Prezidénsia Repúblika, Bairru Pité, Dili, kuarta loraik ne’e.

Nia esplika katak membru Governu hamutuk 42 ne’e kompostu hosi ministru hamutuk na’in 10, vise-ministru na’in 11 no sekretáriu estadu hamutuk 18.

Lú Olo dehan Prezidente Repúblika nia kompeténsia ba nomeiasaun ne’e liuhusi interpretasaun konjugada hosi konstituisaun artigu 74, artigu 86 nomós artigu 106, tanba ne’e nia sei haree atu aseita ka lae membru Governu balun.

“Ohin ha’u sei estuda hela nafatin lista membru Governu ne’e para bele informa fali ba Primeiru-Ministru Nomeiadu iha tempu aban katak Prezidente Repúblika aseita ona ka la aseita membru balun,” Lú Olo tenik.

Nia hateten Prezidente Repúblika laiha motivu polítiku hasoru membru Governu sé de’it, maibé bainhira Prezidente nomeia membru Governu ida ne’ebé aprezenta hosi Primeiru-Ministru Nomeiadu ho intensaun hakarak atu garante dignidade Estadu no garante regulár funsionamentu instituisaun Estadu.

“Ida ne’e ho objetivu oinsá ita nia Estadu bele hamriik ho nia oin rasik. Signifika katak Estadu ida ho nia autoridade rasik atu bele halo serbisu ba oin,” Lú Olo esplika.

Xefe Estadu afirma bainhira membru Governu balun nia kazu iha hela Tribunál maibé Prezidente Repúblika aseita hodi fó nomeiasaun ba membru Governu refere, signifika Prezidente Repúblika nia matan delek ona.

Jornalista: Xisto Freitas

Editór : Manuel Pinto

HUSIK IDA HATÁN