Nova Zelándia Fahe Esperiénsia ba Diplomata Timoroan

0
315
Sesaun foto hamutuk. Foto: MNEK

DILI, (TATOLI) – Embaixadór Nova Zelandia ba Timor-Leste, Vicky Poole, akompañadu husi nia diretór jerál asuntu multilaterál, Philip Taula, fahe esperiénsia kona-ba membru Konsellu Seguransa Naun-permanente, Organizasaun Nasaun Unida (ONU) ba diplomata timoroan sira.

“Nia mai fahe esperiénsia saida mak ita bele halo? Tanba tempu ona, ita mós tenke serbisu maka’as, ita promove ita-nia rain,” informa Vise-Ministra Negósiu Estranjeiru no Kooperasaun, Adalgija Magno, ba jornalista sira, iha Ministériu Negósiu Estranjeiru no Kooperasaun (MNEK), Praia dos Coqueiros, ohin.

Vise-ministra, Adalgiza Magno, hatutan ita hatene katak ema ne’ebé kuñesidu iha mundu, liliu iha ONU, diplomata Timór mak diplomata seniór timoroan, José Ramos Horta, agora ita tenke kaderniza ita-nia ema foun para bele ativu.

Ita indepedénsia tinan 16, la iha ema (diplomata) hanesan José Ramos Horta. “Agora saida mak ita bele halo? Ita tenke ativu iha sesaun sira hanesan ne’e, non-permanent member security council (membru konsellu seguransa naun-permanente)-ida ne’e, ita tenke ativu ba eleisaun. Agora atu prepara ida ne’e, mínimu tinan ualu”, esplika governante ne’e.

“Prepara ita-nia rekursu, ajuda ita-nia embaixada iha Nova Iorke; buat sira ne’e la fásil. Purtantu, ida ne’e mak ita komesa prepara ona oinsá haree rekursu, rona esperiénsia seluk para ita bele prepara ona ita-nia aan ba oin ne’e oinsá? Ida ne’e mak objetivu”, reforsa tan vise-ministra.

Iha okaziaun ne’e, Vise-ministra, Adalgiza Magno, hato’o mós agredesimentu ba Nova Zelándia, tan durante ne’e kontribui maka’as ba dezenvolvimentu Timor-Leste ninian.

Apoiu ne’ebé mak Nova Zelándia oferese ona ba Timor-Leste mak atribuisaun bolsa estudu ba timoroan sira, kapasitasaun, apoia iha kestaun seguransa iha ámbitu formasaun polísia komunitária, inklui atividade agrikultura, iha Likisa no Ermera nomós apoiu seluk tan.

“Ha’u hakarak agredese embaixada Nova Zelándia tan ho laran lu’ak hakarak ajuda liliu ba ministériu ne’e (MNEK)”, agredese Adalgiza.

Antes ne’e, iha loron hirak liubá, embaixada Nova Zelandia konvida nia péritu sira, hodi fahe mós koñesimentu no esperiénsia ba Timor-Leste, iha MNEK, kona-ba adezaun Timor-Leste hodi sai membru OMK (Organizasaun Mundiál Komérsiu).

Tanba, oras ne’e dadaun nasaun ne’e sei hanesan membru observadór ba organizasaun internasionál ne’e.

Jornalista: Rafy Belo

Editora: Rita Almeida

HUSIK IDA HATÁN